A curtametraxe do creador lucense Brian Rodríguez, Maullidos de látex estará na selección oficial do Festival RIR – Festival Internacional de Curtas de Comedia. A curtametraxe foi escrita e dirixida por el mesmo e co-protagonizada por Javier Miranda e Olalla Caamaño. O Festival celebrará esta primeira edición en Allariz entre o 5 e o 9 de setembro.
A curtametraxe, que conta a historia dun home que un día se pon unha máscara de gato e non a volve a sacar, está filmada coas formas estilísticas propias dos vídeos informativos dos medios dixitais. Ao longo dos seus dez minutos desfilan unha vintena de actrices e actores lucenses ademais dalgún persoeiro da cidade. A curta foi realizada, coma é habitual nas curtas de Brian, de man da asociación lucense Juan Casaveteiro.
Este filme supón o retorno de Brian Rodríguez ao universo da curtametraxe tras De fiestuki con la peñuki, curtametraxe presentada a comezos de 2016 e que foi seleccionada para participar no festival Primavera de Cine e no Galician Freaky Film Festival, ambos de Vigo. Tamén gañou o premio Non Vale Furar no irreverente festival lucense Grotesque Film Festival.
