A Dirección Xeral de Tráfico (DXT) porá en marcha desde o vindeiro luns, 15 de outubro, dous novos equipos de control de velocidade que se localizarán no tramo da Autovía do Cantábrico (A-8) que une o Principado de Asturias e a provincia de Lugo.
Uns novos dispositivos que teñen como obxectivo a redución dos accidentes mediante o control do cumprimento dos límites de velocidade. Así, haberá un radar de tramo en cada sentido na A-8 entre os puntos quilométricos 505 e 506, aproximadamente na Ponte dos Santos que une Ribadeo con Asturias. O límite de velocidade é de 120 km/ h en ambos os casos.
A información destes novos sistemas de detección da velocidade observarase na estrada mediante sinal vertical previo, visible a partir do 1 de outubro, aínda que se realizarán os últimos ensaios ata o día 15 de outubro, data desde a que se tramitarán as denuncias polos excesos de velocidade que se detecten.
