Lugo Sen Mordazas inicia unha campaña para aqueles comerciantes e hostaleiros que non apoien a Ordenanza Cívica

A Plataforma Lugo Sen Mordazas, formada por máis de 30 colectivos sociais e culturais que piden que o goberno local retire o proxecto de Ordenanza de Seguridade e Civismo, vén de iniciar unha campaña dirixida ao pequeno comercio e aos locais de hostalaría, para que os pequenos empresarios e autónomos que queiran desmarcarse do discurso reaccionario e discriminatorio de certos “lobbies” empresariais da cidade poidan facelo e expresar libremente a súa postura en contra deste texto normativo que propón o PSOE e apoian PP e Ciudadanos. A Plataforma acaba de poñer a disposición de toda a xente un cartaz anti-mordaza que reza o lema Este espazo non apoia a ordenanza mordaza. Por un Lugo vivo e diverso, e que repartirá físicamente ademáis de ofrecelo na súa web https://lugosenmordazas.noblogs.org/material/, para que calquera que o desexe o poida descargar e expoñelo no escaparate do seu negocio.

Os colectivos que conforman Lugo Sen Mordazas consideran que os membros das patronais e asociacións veciñais que se uniron no Observatorio de Seguridade, e que se están adicando a presionar para que dende o Concello de Lugo se aplique a “man dura” sobre as persoas con menos recursos ou en risco de exclusión, ou simplemente contra calquera que opte por un xeito alternativo de vida ou faga uso do seu dereito de protesta ou expresión cultural; arrogáronse a potestade de representar a todo o sector comercial e de servizos da cidade, cando hai unha grande parte dos autónomos e dos donos e donas de moitos negocios que non comparten ese punto de vista.

Por iso Lugo Sen Mordazas lanza esta campaña en positivo, para darlle a oportunidade á parte deste sector económico que é inclusiva e solidaria de dar a coñecer a súa oposición á Ordenanza Mordaza e colaborar co traballo da Plataforma. Os establecementos que queiran tamén poden descargar a folla de sinaturas e publicitarse na web de Lugo Sen Mordazas como punto de recollida das mesmas, así como imprimir o folleto informativo que explica as sancións e repartirlo no seu local.