O Concello de Lugo renuncia a cobrarlle ás compañías telefónicas pola utilización que fan da vía pública ao tender as infraestruturas coas que prestan o servizo de móbil, segundo denunciou Lugonovo esta mañá.
Para a agrupación municipal o motivo, segundo a documentación facilitada á agrupación municipal polo goberno local esta mañá, apunta ao feito de que xa se están redactando tres regulamentos pendentes, o do guindastre, o do IBI e dos comedores escolares, polo que o departamento encargado de redactalos non pode asumir máis carga de traballo.
Para o voceiro de Lugonovo, Santiago Fernández Rocha, este feito é “inaudito e simplista, unha tomadura de pelo”.
A resolución argumenta que “neste intre non é posible redactar a ordenanza de telefonía móbil por canto implica a obtención de información de liñas telefónicas e outra serie de datos para a conformación do estudo de custos que son de difícil cuantificación e esixen un período longo para o seu desenvolvemento”. Segundo explica Fernández Rocha, con esta afirmación, o seu partido entende que o goberno “prefire desistir no intento de obrigar ás grandes empresas a contribuír cos impostos locais”.
O voceiro da formación anuncia que interpelará por escrito ao executivo para coñecer cales son as súas verdadeiras intencións. E aclarou que agardan que a respostas sexa, dixo, máis seria e convincente.
No seu día a formación apuntaba que este tributo podería supoñer para a cidade o ingreso de preto de medio millón de euros anuais, tendo en conta que Vigo percibe polo mesmo concepto 800.000 euros.
