Segundo denuncia a plataforma política Lugonovo “case tres anos traballando nun prego de contratación que parece non vai rematar nunca e a cada pregunta sobre os motivos desta demora unha contestación máis ridícula, se cabe, que a anterior”.
“A concelleira de Cultura leva moitos meses tratando de esquivar este asunto. Xa no pleno de novembro de 2016 dera a súa palabra de facer público o documento en 15 días e, a piques de rematar febreiro, seguimos agardando por el”, reprocha Cristina Pérez Herráiz.
A edil de Lugonovo relata que, dende o 2015, esta formación preguntou en incontables ocasións pola tramitación da concesión pero “as respostas da señora Basadre son sempre algunha escusa ocorrente e insólita que non convence a ninguén e que, nin moito menos, xustifica o atraso”.
“Vai sendo hora, se ela non é capaz, de que alguén do goberno aclare o que está a pasar con esa licitación. Cremos que non fai falta recordarlle que a adxudicación está caduca, que ten continuos reparos de legalidade por parte do interventor e que, mentres iso non cambie, o Concello segue a ser cómplice dunha filial de Vendex á que lle entrega, nada máis e nada menos, que medio millón de euros anuais por manter esta situación, como mínimo, dunha maneira alegal”, advirte Pérez Herráiz.
Dende o Grupo Municipal insisten en que “o executivo aínda non foi quen de resolver, dende que chegou ao goberno, ningún dos procesos contractuais que estaban extinguidos”.
