O PP urxe á Deputación ao pago aos concellos afectados polos lumes

O Grupo Provincial Popular pídelle á Deputación de Lugo “axilidade” para facer efectivas as axudas comprometidas aos concellos afectados polos lumes do pasado mes de outubro. De feito, os populares anuncian que levarán a Pleno unha iniciativa coa que reclamarán o pago destas axudas comprometidas polo Goberno provincial.

Os populares destacaron que a Xunta de Galicia dese cumprimento ao compromiso cos concellos afectados a través da sinatura dos convenios de colaboración para sufragar o 50% dos custos das súas actuacións na extinción dos lumes e dos danos que estes puideron causar en infraestruturas e servizos municipais.

Concretamente, o delegado da Xunta en Lugo asinaba este luns o convenio cos Concellos de Castro de Rei, Cervantes, Negueira de Muñiz, As Nogais e Pantón, os cinco que solicitaron estas axudas conforme ao establecido na convocatoria para a que o Goberno galego achegaba un orzamento de 13,2 millóns de euros.

Agora, dende o Grupo Provincial esíxenlle ao Goberno da Deputación de Lugo dar resposta ao compromiso adquirido, xunto ao Goberno central, coa Federación Galega de Municipios e Provincias (Fegamp) para financiar o outro 50%.

Os deputados populares úrxenlle ao ente provincial para “dar cumprimento a estes compromisos adquiridos co obxectivo de desafogar as arcas municipais daqueles municipios afectados”; xa que “a Deputación debe estar ao servizo dos Concellos da provincia”.

Novas relacionadas

Deixar unha resposta

A súa dirección de email non será publicada. Os campos requeridos están marcados *

This site uses Akismet to reduce spam. Learn how your comment data is processed.


Diario de información xeral sobre Lugo e a súa provincia
San Salvador de Muxa 124 27192, Lugo