A Asociación Animalista Libera e a Fundación Franz Weber instaron esta mañá á rexedora, Lara Méndez, a iniciar os trámites de elaboración dun novo marco local de protección e benestar dos animais, que asuma os avances autonómicos e aproveite para garantir dereitos que reclama a cidadanía, incluíndo o non apoio a eventos crueis con animais. A “Ordenanza Municipal para a Protección e Tenencia de Animais” do Concello de Lugo vai camiño de cumprir unha década desde a súa aprobación en outubro do ano 2008 e sen sufrir ningunha adaptación de calado, tampouco cando hai xa catro anos se modificou a normativa autonómica para actualizar a contía das sancións.
Os animalistas sinalan que o consistorio non pode permanecer impasible ante os cambios que se deron nos últimos anos na materia e “resulta curioso que o goberno local non reclamase absolutamente nada en materia de competencias municipais e carga económica, xa que a nova Lei apenas dispón de dotación orzamentaria. Mentres a Deputación Provincial de Pontevedra ou a súa homóloga coruñesa convocan axudas para entidades protectoras, contribuíndo a cofinanciar accións educativas e campañas de sensibilización, o consistorio lucense ignora unha problemática que supón centos de abandonos cada ano e non poucos casos de malos tratos no termo municipal”. De forma paralela FFW e LIBERA! propuxeron á cidadanía lucense que “sexan ‘especialmente proactivos’ para reclamar agora a xestión ética das colonias de gatos ferales, con apoio público, así como zonas de esparexemento, como as que se abriron no último ano no Concello da Coruña”.
