O PP denuncia falta de persoal de mantemento e limpeza nas piscinas municipais

O PP municipal denunciou esta mañá que a falta de persoal de mantemento e limpeza nas piscinas municipais durante as fins de semana dispara as queixas dos usuarios. O vicevoceiro da agrupación, Enrique Rozas, asegurou que esta circunstancia non só se traduce nunha limpeza deficiente en vestiarios e zonas comúns senón tamén nos chequeos do estado da auga e da instalación para comprobar o cloro, o ph ou a temperatura, que non se fai dúas veces ao día como o resto da semana.

O edil popular explicou que “tanto o control de auga, como a limpeza periódica das piscinas, segundo figura no prego de condicións, ten que realizarse os sete días da semana”, engadindo que o goberno local é perfectamente coñecedor destas deficiencias porque na propia Comisión de Queixas “mes si mes non, chegan denuncias de usuarios que relatan os problemas de hixiene detectados en ambas as dotacións deportivas”.

“Non entendemos a despreocupación e a falta de control dos socialistas á hora de previr calquera tipo de incidencia” reflexionaba o viceportavoz dos populares lembrando que “a media de usuarios diarios nas piscinas municipais ronda as 1.000 persoas”.

Os populares tamén anunciaron que pedirán en Comisión ao goberno local que realice os investimentos necesarios para corrixir diferentes problemas que se detectan nas piscinas “reparación de teitos en vestiarios que están deteriorados pola condensación, mellora da iluminación, reposición de chaves para poder utilizar os despachos de billetes que están bloqueadas, reparación de tornos para acceso ás instalacións que non funcionan e recuperar o reloxo de adestramento que está desaparecido”.

Por outra banda, Enrique Rozas anunciou que presentará unha batería de preguntas para “aclarar como é posible que haxa ocupación nas pistas de atletismo Gregorio Pérez Rivera durante as mañás durante toda a semana cando non hai persoal encargado desta dotación”. “Algo similar ocorre nas pistas de tenis de Frigsa” sinalou o viceportavoz do PP. Para Rozas “é grave a falta de control nestas infraestruturas públicas” polo que pide explicacións ao goberno da súa xestión e uso.

Novas relacionadas

Deixar unha resposta

A súa dirección de email non será publicada. Os campos requeridos están marcados *


Diario de información xeral sobre Lugo e a súa provincia
San Salvador de Muxa 124 27192, Lugo