A Consellería de Medio Ambiente e Ordenación do Territorio e o concello de Guntín colaborarán para mellorar o saneamento en Pradedo de Arriba, tal e como se recolle no convenio asinado entre a titular do departamento autonómico, Beatriz Mato, e o alcalde da localidade, Jesús Carreira.
Actualmente este núcleo rural non dispón de rede de saneamento, polo que con esta actuación preténdese poñer en marcha este servizo mediante a canalización, a instalación de pozos de rexistro e dun sistema de depuración. Posteriormente, procederase á reposición dos pavimentos danados pola execución das obras.
Para executar estes traballos, o Goberno galego achegará case 39.000 euros, cofinanciados polo Fondo Europeo Agrícola de Desenvolvemento Rural (FEADER)
Esta actuación súmase ao convenio asinado o mes pasado entre a Consellería e o concello para levar a cabo a cabo a rehabilitación da estrada que conduce ao centro escolar, dotado con 60.000 euros.
Os obxectivos principais dos traballos pasarán por mellorar a accesibilidade da estrada que conduce ao centro escolar, que parte da N-540 e enlaza coa LU-P 2409. Posto que se trata dunha estrada que presenta un considerable estado de deterioro debido a súa antigüidade.
En concreto, as actuacións consistirán na reparación e substitución de lousa hidráulica nas beirarrúas e na reparación do pavimento da calzada.
