Mañá, mércores 24 de xuño, ás 12:00 horas, no Salón de Plenos do Pazo de San Marcos,terá lugar a sesión de constitución da nova Corporación Provincial da Deputación de Lugo.
En primeiro lugar, comporase a Mesa de Idade, integrada polos Deputados Provinciais de maior idade, Jesús Carreira, e de menor, Pablo Rivera Capón, que a continuación xurarán ou prometerán o seu cargo. Tamén formará parte da Mesa o Secretario da institución, José Mourelle Cillero.
De seguido, será o acto de xuramento ou promesa dos restantes 23 Deputados Provinciais,declarándose constituída a nova Corporación Provincial da Deputación de Lugo, en conformidade co disposto no apartado 3º do Artigo 57 do Regulamento de Organización, funcionamento e Réxime Xurídico das Entidades Locais.
Ao remate, e en aplicación do mencionado artigo, así como do 14.3 do Regulamento de Honras e Distincións, procederase á elección do novo Presidente/a Provincial, unha incógnita polo momento xa que o BNG esixe a retirada do candidato socialista, Manuel Martínez para apoiar ao Partido Socialista, extremo que dende o PSdG rexeitan de plano.
Será unha votación en segredo e en urna por parte dos 25 Deputados Provinciais. Tras o escrutinio dos votos, proclamarase ao novo Presidente da Deputación de Lugo.
O Presidente electo xurará ou prometerá o cargo e recibirá os atributos correspondentes: o Bastón de Mando, a Medalla da Presidencia, a Insignia de Ouro da Provincia e o Diploma Acreditativo. O Presidente ocupará entón o seu posto na Mesa Presidencial e fará a súa intervención. A continuación, todos os membros da Corporación Provincial asinarán no Libro de Ouro da Deputación de Lugo.
Logo, os restantes 24 Deputados tamén recibirán os atributos representativos, que neste caso son a Medalla, a Insignia de Ouro da Provincia e o Diploma Acreditativo. O acto rematará cunha foto de familia no Paraninfo e no patio exterior do Pazo Provincial.
