A Xunta de Galicia celebra o Día do Libro en Lugo cun programa cultural pensado para públicos de todas as idades, que terá como escenario principal a Biblioteca Pública. A proposta combina música, literatura e teatro ao longo de varios días.
As actividades arrancan o propio Día do Libro, este xoves, cun concerto do Coro do Hospital de Lugo, que actuará ás 19.00 horas no salón de actos. O grupo ofrecerá un repertorio variado no que se mesturan pezas da tradición galega con outras procedentes doutras partes de España e de Latinoamérica.
A continuación, ás 20.00 horas, presentarase a novela ‘1140’, da autora María José Tardágulla. A obra traslada ao lector ao Camiño de Santiago no século XII, nunha historia na que peregrinos, templarios e veciñanza local se enfrontan a distintos retos nun contexto marcado pola fe e o misterio. Tanto o concerto como a presentación serán de entrada libre ata completar o aforo.
No marco desta celebración, a Biblioteca tamén entregará 200 libros ao Hospital Universitario Lucus Augusti (HULA), co obxectivo de ampliar o fondo da súa biblioteca e facer máis agradable a estancia das persoas ingresadas.
A programación pecharase o sábado 25 cunha actividade pensada para o público máis novo. Ás 12.00 horas representarase ‘A historia do coelliño branco’, un espectáculo de Migallas Teatro interpretado por Bea Campos, baseado nun conto popular portugués e dirixido a nenos e nenas a partir dun ano.
