O salón de sesións do Concello de Lugo acollerá mañá, martes, ás 13.00 horas, a presentación do libro Lugopoética 2025, unha publicación que recolle o contido das seis conversas poéticas celebradas o pasado ano na UNED de Lugo, promovidas polo Colectivo Egeria co apoio da UNED e da Xunta de Galicia.
A obra reúne as intervencións de trece poetas vinculados ás terras lucenses: Mar Ferreiro, Lucía López Cancio, Gustavo Enríquez, Claudio Rodríguez Fer, Carmen Blanco, Ana Vila Portomeñe, Paco Ledo, Manuel Regal, Xosé Miguélez, Xoán Neira, Toño Núñez, Miguel Ángel Martínez Quintanar e Abraham Pérez.
Segundo destacan os organizadores, o proxecto reflicte a diversidade humana e profesional dos participantes, entre os que figuran alumnos da UNED, mestres, filósofos, cregos e labregos.
No acto intervirán o presidente do Colectivo Egeria, Xulio Xiz; o coordinador das conversas, o profesor e poeta Xosé Carlos Ulloa; a directora da UNED Lugo, Ana Traseira; o secretario xeral da Lingua, Valentín García, e a alcaldesa de Lugo, Elena Candia.
Lerán cadanseu poema os dous poetas labregos, Ana Vila Portomeñe e Paco Ledo, e o alumno da UNED, Gustavo Enríquez.
