A Audiencia Provincial de Lugo condenou a unha exconcelleira de Láncara e a un familiar a dous anos de prisión e ao pagamento dunha multa de 1.890 euros por un delito continuado de falsidade en documento mercantil en concurso medial cun delito continuado de estafa. Ademais, ambos deberán indemnizar cun total de 39.270 euros a un dos prexudicados polos danos ocasionados.
Segundo recolle a sentenza, o tribunal considera probado que os acusados actuaron de maneira concertada para obter un enriquecemento ilícito mediante a manipulación de documentos bancarios falsificados. O primeiro dos feitos refírese á compra dun tractor, operación na que os condenados presentaron un documento bancario manipulado no que figuraba unha transferencia inexistente.
O vendedor intermediario, convencido de que o pagamento fora realizado ao propietario da maquinaria, entregoulles o tractor, que os acusados incorporaron posteriormente ao seu patrimonio. A sala entende que existía un plan preestablecido e que ambos actuaron de común acordo coa finalidade de enganar ao intermediario e apropiarse do vehículo sen aboar o importe correspondente.
Os maxistrados tamén consideran acreditado un segundo episodio de características semellantes relacionado cunhas obras de reforma integral nun domicilio. Nese caso, os acusados empregaron novamente o mesmo documento PDF manipulado, alterando a contía, a data e o destinatario da suposta transferencia bancaria.
Así, fixeron constar un pagamento ficticio de 39.272 euros a favor dun contratista que xa iniciara os traballos sen recibir ningunha cantidade económica. Co documento falsificado pretendían facerlle crer á vítima que a factura polos traballos executados fora abonada correctamente.
Na resolución, a Audiencia destaca que “a conduta dos acusados evidencia unha vontade conxunta claramente destinada a producir engano nos dous prexudicados”, procurando aparentar solvencia económica mediante a creación de falsas transferencias bancarias que nunca chegaron a efectuarse.
O tribunal aplica a atenuante de dilacións indebidas, pero aprecia tamén continuidade delituosa ao considerar que os acusados elaboraron e utilizaron documentos mercantís falsos en distintos momentos temporais para cometer sucesivos delitos de estafa contra diferentes vítimas.
A sentenza non é firme e pode ser recorrida ante o Tribunal Superior de Xustiza de Galicia.
