A voceira adxunta do Grupo Municipal Socialista de Lugo, Ana González Abelleira, denunciou este xoves as deficiencias existentes nos sistemas de climatización e ventilación da Biblioteca Pública Ramón Ferreiro e reclamou á Xunta de Galicia unha intervención urxente para solucionar unha situación que, segundo asegura, se prolonga desde comezos de ano.
A edil socialista sostén que o sistema de calefacción e aire acondicionado da sala de adultos permanece fóra de servizo desde principios de 2026, unha circunstancia que estaría a provocar temperaturas elevadas no interior das instalacións, especialmente durante as últimas semanas, coincidindo co incremento das temperaturas.
Segundo indicou González Abelleira, durante a xornada do mércores rexistráronse doce queixas de usuarios polas condicións existentes nas salas de estudo e lectura. A concelleira tamén criticou a imposibilidade de abrir as fiestras para favorecer a ventilación natural do edificio, unha medida que, ao seu xuízo, agrava a situación.
A representante socialista lembrou que a Biblioteca Ramón Ferreiro é unha infraestrutura dependente da Xunta de Galicia e asegurou que as actuais condicións afectan tanto aos usuarios como ao persoal do centro. Neste sentido, reclamou ao Goberno autonómico unha actuación inmediata para reparar os sistemas de climatización e garantir unhas condicións adecuadas para estudantes, opositores, investigadores e demais usuarios.
Por último, González Abelleira instou tanto á Xunta de Galicia como ao Goberno municipal a actuar con urxencia para resolver unha situación que, segundo advertiu, non pode prolongarse máis no tempo.
