A subdelegada do Goberno en Lugo, Olimpia López, animou á mocidade da provincia nacida no ano 2008 a solicitar o Bono Cultural Xove 2026, unha iniciativa do Goberno de España que concede unha axuda de 400 euros para a adquisición de produtos, servizos e actividades culturais. O prazo para presentar as solicitudes permanecerá aberto ata o próximo 31 de outubro.
López destacou que este programa busca facilitar o acceso da poboación nova á cultura ao tempo que contribúe a impulsar o sector cultural. Segundo sinalou, a iniciativa pretende achegar aos mozos e mozas a diferentes experiencias culturais e fomentar o seu contacto coa creación artística e co patrimonio cultural.
O Bono Cultural Xove está dirixido ás persoas que cumpran 18 anos ao longo de 2026 e que teñan nacionalidade española, residencia legal en España ou a condición de solicitantes de asilo, desprazados temporais ou estranxeiros extutelados. Segundo os datos do Instituto Nacional de Estatística, na provincia de Lugo existen 2.205 potenciais beneficiarios desta convocatoria.
As solicitudes deberán realizarse a través da páxina web oficial do programa. Para completar o trámite será necesario dispoñer dun sistema de identificación dixital, xa sexa Cl@ve (en modalidade básica ou avanzada) ou certificado dixital. A solicitude poderá presentarse directamente pola persoa beneficiaria ou mediante un representante adulto, achegando a documentación requirida.
Unha vez concedida a axuda, os beneficiarios disporán dun ano para empregar os 400 euros nos establecementos adheridos ao programa, que nesta edición suman 4.781 en toda España, dos cales 390 están situados en Galicia.
O importe distribuirase en diferentes categorías de gasto: 100 euros para produtos culturais en soporte físico, como libros, discos ou publicacións; outros 100 euros para produtos e servizos dixitais, entre eles plataformas de contidos, prensa dixital, videoxogos ou pódcasts; e 200 euros para a asistencia a actividades culturais como concertos, teatro, cinema, museos, festivais ou espectáculos de danza.
Como principal novidade da convocatoria de 2026, o Bono Cultural Xove permitirá tamén destinar, ata o límite da contía concedida, recursos á realización de cursos e talleres culturais, tanto presenciais como en liña, así como á adquisición de instrumentos musicais e doutros materiais relacionados coa creación artística.
