A sección segunda da Audiencia Provincial de Lugo condenou a tres anos de prisión un home por un delito de lesións tras agredir a outro cun vaso na cara durante unha liorta ocorrida no exterior dun pub.
Na sentenza, as maxistradas consideran acreditado que o acusado golpeou á vítima cun vaso que levaba na man, baseándose nas imaxes captadas polas cámaras de seguridade do establecemento e no testemuño da persoa agredida.
Como consecuencia da agresión, a vítima sufriu lesións que precisaron tratamento cirúrxico e que lle deixaron dúas cicatrices permanentes, unha na rexión ciliar e outra na meixela. Segundo recolle a resolución xudicial, estas secuelas ocasionáronlle un prexuízo estético cualificado como moderado.
Pola contra, o tribunal absolveu o acusado do delito de lesións relacionado cunha segunda persoa que tamén resultou ferida durante os feitos. A Audiencia explica que a cualificación xurídica formulada pola acusación non permitía ditar unha condena polos feitos finalmente considerados probados, en aplicación do dereito de defensa e do principio acusatorio.
A sentenza foi dada a coñecer este xoves polo Tribunal Superior de Xustiza de Galicia (TSXG).
