A exposición, organizada pola Fundación Rosalía de Castro, poderá visitarse en Lugo ata o 22 de outubro
O primeiro andar do Bloque de Mulleres do Vello Cárcere de Lugo acolle desde este mércores a exposición ‘Rosalía Ilustrada’, unha mostra que reúne 35 obras orixinais inspiradas en textos de Rosalía de Castro.
A iniciativa, organizada pola Fundación Rosalía de Castro, ofrece outras tantas interpretacións gráficas da obra da escritora a través do traballo de ilustradores e ilustradoras de Galicia. Cada participante achega a súa propia visión do universo literario rosaliano.
A exposición recupera un proxecto iniciado en 2004 co obxectivo de achegar os textos de Rosalía de Castro ao público por medio da ilustración. Nesta edición incorpóranse obras de dez novos autores e autoras.
‘Rosalía Ilustrada’ permanecerá aberta ao público no Vello Cárcere ata o 22 de outubro.
