A Xunta de Goberno Local tamén aprobou a licitación da seguridade de oito centros sociais e adxudicou a iluminación do San Froilán e do Nadal.
A Xunta de Goberno Local de Lugo acordou solicitar unha subvención de 273.355 euros á Xunta de Galicia para poñer en marcha unha Unidade Municipal de Atención Temperá. O servizo, cun custo estimado de 328.026 euros, funcionaría entre xaneiro de 2027 e outubro de 2028.
A proposta prevé un equipo de tres profesionais —psicoloxía, logopedia e terapia ocupacional ou fisioterapia—, 9.459 horas de atención e arredor de 388 menores atendidos durante os 22 meses. O Concello traballa na ordenanza, nos pregos e na elección da sede, para a que se baralla o Centro Interxeracional Paco Martín. A prestación realizaríase mediante concerto social.
O órgano municipal aprobou tamén o expediente para contratar a seguridade privada sen armas de oito equipamentos sociais. O contrato terá un orzamento inicial de 597.655 euros e unha duración aproximada de 19 meses, prorrogable ata dous anos máis.
Na mesma sesión adxudicouse a Creaciones Luminosas S.L. a iluminación ornamental do San Froilán e do Nadal por 317.485 euros. A montaxe incluirá máis de 2,3 millóns de luces micro LED entre ambas as campañas.
Ademais, o Concello avanzou na cobertura de catro prazas da Policía Local e dúas de ordenanza coa designación dos tribunais cualificadores. A Xunta de Goberno propuxo tamén adxudicar a Caudal Fest S.L. o patrocinio publicitario do festival de 2026 por 217.679 euros.
