As obras Imaxinario festivo e O polbo da feira anunciarán as festas, que se celebrarán do 4 ao 12 de outubro
O xurado do concurso para seleccionar os carteis do San Froilán e do San Froilán Miúdo de 2026 elixiu como gañadoras as propostas presentadas por Alfredo León Mañú e Irene Huéscar Villapún, respectivamente. Os deseños acompañarán a difusión das festas patronais de Lugo, que se celebrarán do 4 ao 12 de outubro.
Segundo informou o Concello, as candidaturas foron avaliadas atendendo aos criterios establecidos nas bases, entre eles o deseño, a composición estética, a orixinalidade, a creatividade e a calidade técnica. A convocatoria buscaba unha imaxe vinculada á cidade e ás súas festas.
A obra seleccionada para anunciar o San Froilán é de Alfredo León Mañu e leva por título Imaxinario festivo. Trátase dunha composición simétrica e minimalista que reúne elementos asociados á celebración, como o polbo, as tesoiras, o aceite, a música, a pandeireta e o carrusel. O autor utiliza unha paleta reducida de cores e unha linguaxe gráfica común para representar estes motivos.
León Mañú conta con máis de 25 anos de experiencia no deseño gráfico e, de acordo coa información facilitada polo Concello, obtivo máis de 180 premios en distintos certames. Entre os seus traballos figura tamén o cartel do San Froilán de 2022.
No concurso do San Froilán Miúdo, ao que se presentaron dez propostas, o xurado escolleu O polbo da feira, de Irene Huéscar Villapún. A autora é unha estudante lucense de primeiro curso da ESO, con formación plástica autodidacta, que estuda trompeta e participa na Banda Filarmónica e en Claustro Música.
O cartel sitúa o polbo como elemento central e transfórmao, mediante un xogo gráfico, nunha atracción de feira. A obra empregarase na promoción das actividades dirixidas ao público infantil.
O órgano encargado da selección estivo integrado polo artista multidisciplinar Juan José López Martínez, Lomarti; a historiadora da arte e investigadora Lucila Yáñez Anlló; o ilustrador Xoán Guerreiro Vázquez, e o artista plástico e profesor Gonzalo Sánchez Folgueira, Zalo.
O concelleiro de Cultura, Javier Vázquez, felicitou as persoas gañadoras e agradeceu a participación no concurso. O edil defendeu o carácter aberto da convocatoria e afirmou que o Goberno local continuará traballando na organización das festas.
