A Audiencia Provincial de Lugo absolve, por falta de probas, a un acusado de agredir sexualmente a dúas menores. Na sentenza, indica que, neste caso, “ha de partirse do feito certo, por recoñecemento de todas as partes, de que o procesado mantivo unha relación con ambas as menores, nun período máis afastado cunha delas e, inmediatamente anterior aos feitos, coa outra”.
A Sala sinala que non pode apreciarse o delito, consistente en diversos tocamentos nos peitos, por encima da roupa, respecto a unha das menores. E, en canto ao testemuño da outra denunciante, non aprecia “que falte á verdade na narración do que refire”, pero conclúe que a súa versión, “a falta de corroboracións periféricas”, se advirte “insuficiente para alcanzar un pronunciamento condenatorio”.
A Sala salienta no fallo que, “mentres a condena presupón a certeza da culpabilidade, a absolución non presupón a certeza da inocencia”. Así, destaca que a absolución “non se deriva da proba da inocencia, senón da frustrada proba da culpabilidade, máis aló de toda dúbida razoable”.
