Esta mañá celebrouse no salón de actos do Concello de Lugo unha nova sesión da Xunta Local de Seguridade, presidida polo alcalde, Miguel Fernández, e a subdelegada do Goberno en Lugo, Isabel Rodríguez. na que se formalizou o convenio de colaboración entre as Administracións autonómica e local que permitirá a apertura, fóra do horario lectivo, dos aparcadoiros do IES Ollos Grandes e do IES Lucus Augusti -neste caso, unha vez rematen as obras de rehabilitación integral que o Goberno galego está a executar no centro.
Javier Arias explicou que o Goberno galego prevé rematar “nos vindeiros días” os traballos que está realizando para acondicionar os aparcamentos, coa sinalización das prazas, a colocación de carteleira e a instalación de barreiras nos accesos, “co fin de dotar de maior comodidade aos usuarios, habilitando a entrada e a saída ao aparcadoiro por lugares diferentes”.
Pola súa banda o alcalde de Lugo cualificou o acordo como “un paso adiante necesario, pero que chega con moito atraso por parte da Xunta de Galicia”.
Fernández agradeceu o compromiso da Subdelegación do Goberno e das forzas de seguridade na resolución deste asunto, e advertiu que o Goberno local seguirá “vixiante” para garantir que o acordo aprobado hoxe se cumpra “sen máis demoras nin escusas”.
É necesario lembrar que o acordo foi posible grazas a unha reunión de traballo interadministrativa celebrada o pasado mes de abril entre o Concello de Lugo, a Xunta de Galicia, a Deputación Provincial e a Administración Xeral do Estado, na que se pecharon os termos que permitirán á Policía Local intervir nos aparcadoiros de titularidade autonómica e provincial.
