A voceira municipal do PP en Lugo, Elena Candia, vén de lanzar “Canda Elena”, un novo formato audiovisual de entrevistas biográficas cunha periodicidade quincenal. O programa pretende achegar ao público o lado máis persoal de diferentes protagonistas da vida social, cultural, deportiva e empresarial da cidade, poñendo en valor o talento e as historias que constrúen o tecido lucense.
Neste espazo, Candia actúa como anfitrioa nun ambiente próximo que facilita conversas distendidas sobre traxectorias profesionais e experiencias vitais. O primeiro episodio, xa dispoñible, conta coa participación de Paco e Héctor, do Restaurante España, e pon o foco na tradición familiar, o produto local e o compromiso coa identidade gastronómica de Lugo.
