O Concello de Lugo e a Confederación Hidrográfica do Miño-Sil asinarán un acordo de colaboración para ampliar o paseo do río Rato ata o seu nacemento, unha actuación integrada nun proxecto de mellora da seguridade fronte ás inundacións cun investimento estimado de 2,6 millóns de euros. A intervención centrarase no tramo alto do río e buscará recuperar o espazo fluvial desde o punto de vista hidromorfolóxico e ambiental, ao tempo que habilitará mecanismos naturais para amortecer desbordamentos e reducir riscos.
O proxecto tamén permitirá detectar e resolver problemas na rede de saneamento e recuperar as marxes do río para o uso público, combinando espazos de paseo e estancia coa restauración ambiental do contorno. O alcalde de Lugo, Miguel Fernández, destacou que a actuación supón “un fito histórico” que mellorará a conexión dos barrios do norte co principal corredor verde da cidade. Pola súa banda, o presidente da Confederación Hidrográfica do Miño-Sil, José Antonio Quiroga, subliñou o valor ambiental e preventivo da iniciativa.
O investimento total ascende a 2,6 millóns de euros, dos que a Confederación achegará o 95% (2,47 millóns) e o Concello de Lugo o 5% restante (130.000 euros).
