Novas

Concerto de “Le Parody” na sala Tebras

Este venres, 28 de novembro ás 20:30h  e da man de Teleclube chega a sala Tebras o grupo Le Parody, todo un referente do flamenco-electrónica.

Le Parody é o proxecto musical de Sole Parody, cantante e compositora andaluza que combina nas súas cancións pop escuro, folclores tribais, flamenco e electrónica de baile.

Entre o tecnolóxico e o melodramático, usando sílabas en castelán, estruturas sen retrouso e só instrumentos que caiban nunha maleta de man, conecta cunha infinidade de influencias esvaecidas, dos Andes á India pasando polos desertos do norte de África. Fai cancións de amor e desamor, de revolucións, corpos, bailes.

Cancións que “soan familiares” pero “non se parecen a nada”. A música que conecta os puntos entre Björk e Julieta Venegas. A que cabería no oco que separa unha verbena dunha rave. Non menos xenuíno que as súas composicións é o seu singular formato de directo: Sole combina o manexo de sampler e pedais, mesturando en vivo as distintas capas de loops que compoñen as súas cancións, coa presenza dunha atípica cantautora folk, valéndose de voz e electrónica para tecer melodías e ambientes que arrastran á audiencia ao baile. Do frío ao lume. De casa ao descoñecido.

Entradas en: https://entradium.com/es/events/le-parody-en-lugo

 

Este venres os Codex Cinema estrean os filmes “Blue Moon” e “La Voz de Hind”

Esta tarde os cines Codex estrean os filmes: La Voz de Hind e Blue Moon.

 “La voz de Hind”, baseada en feitos reais, acadou numerosos premios en festivais internacional de cine, entre outros, o Gran Premio do Xurado no Festival de Venecia 2025 ou  o Premio do Público no Festival de San Sebastián 2025.

Sinopse:  o 29 de xaneiro de 2024, os voluntarios da Media Lúa Vermella reciben unha angustiosa chamada de emerxencia: Hind Rajab, unha nena de seis anos quedou atrapada nun coche que está ardendo cos seus tíos e tres curmáns mortos por disparos das Forzas de Defensa de Israel.  A través da liña de emerxencia, os equipos de rescate intentan mantela tranquila ao tempo que coordinan freneticamente o envío dunha ambulancia.

A outra estrea da semana é o filme baseado en feitos reais “Blue Moon” dirixida por Richard Linklater móstranse as tensións creativas, a fraxilidade emocional e a loita interna dun xenio que deixou unha pegada imborrable na historia do teatro musical. (Filme baseado en feitos reais).

Sinopse: na noite do 31 de marzo de 1943, no bar Sardi’s de Nova York, o brillante pero atormentado letrista, Lorenz Hart, afronta a súa soidade e deteriorada autoestima mentres o seu antigo colaborador Richard Rodger, celebra a estrea de “Oklahoma”, o exitoso musical. Antes de que remate a noite, Hart terá que enfrontarse a un mundo que xa non valora o seu talento e tamén á aparente imposibilidade de amor.

Nese escuro escenario, móstranse as tensións creativas, a fraxilidade emocional e a loita interna dun xenio que deixou unha pegada imborrable na historia do teatro musical. (Filme baseado en feitos reais).

A partir de mañá xa se pode visitar o Belén de Begonte

Mañá sábado, 29 de novembro, abrirá o Belén de Begonte (dúas figuras novas) e o renovado Museo do Belén (cunha nova figura en movemento), cun acto ás 18,00 h, no que `pronunciará o Pregón do Nadal o Conselleiro de Cultura, Lingua e Xuventude da Xunta de Galicia, José López Campos.

Neste acto cantará panxoliñas populares Branca Villares, responsable de canto tradicional e Popular das Escolas de Música Músico Crisanto, que impulsan os xconcellos de Begonte, Rábade, Outeiro de Rei e Friol.

O Concello adianta a este venres o espectáculo de drons e o desfile de grupos de recreación histórica

O Concello de Lugo decidiu adiantar dous dos actos da programación coa que se está a celebrar a declaración da muralla como Patrimonio da Humanidade, hai 25 anos. Trátase do espectáculo de drons e do acto protagonizado polas asociacións de recreación histórica romanas e galaicas, que finalmente terán lugar na tarde de mañá, ante as previsións de fortes choivas para o sábado, a xornada escollida inicialmente para a súa celebración.

O espectáculo de 150 drons sincronizados ao ritmo dunha composición do músico e instrumentista, Abraham Cupeiro, creada expresamente para este evento, adiantase a mañá venres, a partir das 19.30 horas e será visible desde o miradoiro do Parque de Rosalía. Unha hora máis tarde, terá lugar outro dos actos da programación, que tamén adiántase ao venres, pola mala climatoloxía prevista para o sábado. Trátase do encontro de asociacións romanas e galaicas, que na contorna da Mosqueira realizarán un acendido de lume e unha ofrenda á Muralla. Previamente, ás 20.00 horas concentraranse na praza de Santa María, para de alí partir cara a porta da Estación e á porta de San Pedro, e finalmente unirse fronte á Mosqueira, a partir das 20.30 horas.

Comeza a rehabilitación da antiga Fábrica da Luz para transformala nun centro enogastronómico

Comezan as obras de rehabilitación da antiga Fábrica da Luz, un edificio emblemático situado á beira do Miño que será transformado nun futuro centro enogastronómico divulgativo. O alcalde de Lugo e o concelleiro de Dinamización Económica, Mauricio Repetto, visitaron o inmoble coincidindo coa firma de replanteo da obra, que contará cun prazo de execución de catro meses e que se enmarca dentro do Plan de Sostibilidade Turística en Destino.

O proxecto de recuperación da Fábrica da Luz actuará sobre o edificio histórico respectando a súa estrutura orixinal e as características arquitectónicas que o converten nun referente do patrimonio industrial da cidade. Contará con espazos diáfanos deseñados para o desenvolvemento de eventos gastronómicos, xuntanzas e puntos de divulgación e degustación. A intervención centrará os seus esforzos na mellora da envolvente e do comportamento enerxético, na substitución das carpinterías por elementos de altas prestacións mantendo a estética orixinal, na mellora da estanqueidade fronte ao risco de inundacións e na reparación dos elementos deteriorados polo paso do tempo e o vandalismo.

Tamén se acometerán traballos de restauración das fachadas, actualización das instalacións e habilitación de espazos interiores para o desenvolvemento de actividades divulgativas vinculadas ao mundo enogastronómico.

A intervención permitirá recuperar un espazo de gran valor histórico que, a finais do século XIX, foi clave no abastecemento eléctrico da cidade, e convertelo nun punto de referencia para a difusión da cultura gastronómica e vinícola de Lugo e a súa contorna. A súa posta en marcha reforzará a oferta divulgativa e turística de Lugo, creando un novo atractivo que completará as experiencias xa existentes e que contribuirá a dinamizar a actividade ao redor do Miño, fortalecendo o vínculo entre a cidade e o seu entorno natural.

 

O chef Rafa Centeno consigue a primeira Estrella Michelin de Lugo

O chef  Rafa Centeno conseguiu a primeira Estrela Michelin de Lugo grazas ao seu restaurante Vertixe, situado na Ribeira Sacra.
O proxecto Vertixe convértese así no único restaurante con Estrella Michelin da provincia de Lugo e o primeiro establecemento de adega de Galicia en obter este galardón.
O restaurante vigués Maruja Limón, capitaneado por Centeo e Inés abril, revalida ademais a súa estrela. A gala Michelin 2026 na que se viron os chefs máis importantes de España, é unha cita obrigatoria no mundo da gastronomía na que se recoñecen os referentes gastronómicos coas cotizadas Estrellas Michelin.

Devocións

Nunca me preocupou o futbol nin os deportes en xeral, pero tiña a idea de que os devotos dun equipo de fútbol se guiaban por principios de amor ás cores, do respecto á canteira… de xeito que o sentimento colectivo da poboación disfrutaba ou se compunxía en razón directamente proporcional á posición do equipo na tabla.

Sei que as cousas cambiaron, que encher un campo modesto é difícil, que os climas frescos coma o noso non animan a acudir aos estadios no inverno, e que ninguén loita por ser directivo dun clube modesto; que moitas veces é unha cruz máis ca unha festa.

Que os clubes dun certo nivel se tivesen que transforman en sociedades anónimas é síntoma de dificultade na xestión, na necesidade de planificar futuros, e facer que cada equipo funcione coma unha empresa, buscándose a vida e o futuro.

O seguinte paso chega cando un equipo de futbol é comprado por unha sociedade mercantil, por unha empresa ou por un estado; e o Lugo é dunha empresa sudamericana, o Atlético de Madrid dun fondo de inversións… porque as empresas buscan onde investir, e o futbol é unha empresa como outra calquera, que busca rendibilidade.

E entón, pregúntolle ao meu neto maior, onde queda a afección, sentir as cores, o vibrar diante dunha situación problemática, ou gozar dunha longa situación de calma garantizada polos resultados… E a resòsta é a máis natural do mundo: Se tés forza económica, di o meu informante, o equipo refórzase, a economía vai ben, estás situado na tabla… Todos satisfeitos.

Que máis che da quen é o propietario do equipo? O que vale son os resultados. A fin de contas, a economía. O demais, non ten importancia. E punto.

 

Actos do Día Internacional para a Eliminación da Violencia contra as Mulleres en Lugo

As inmediacións da árbore da vida de Santo Domingo acolleron esta mañá o acto institucional polo 25N, Día Internacional para a Eliminación da Violencia contra as Mulleres, ao acto acudiron moitas e moitos lucenses, que quixeron amosar así o seu compromiso para loitar fronte á violencia machista, pese á forte choiva que apareceu pouco antes de rematar a lectura do manifesto.

A edil Ángeles Novo foi a encargada de dar paso a esta lectura, a cargo dunha antiga usuaria da Casa da Muller, non sen antes resaltar que “hoxe é un día para reafirmarnos na responsabilidade que temos como sociedade de garantir vidas libres de medo, de agresións e de desigualdades”.  “A defensa dos principios de igualdade, seguridade, liberdade, integridade e dignidade inherentes a todos os seres humanos son unha prioridade para todos e todas, e nesta liña comprometémonos coa loita contra a violencia exercida contra as mulleres polo simple feito de selo e contra os seus fillos e fillas”, sinalou.

Ademais, lembráronse ás 39 mulleres mortas a mans das súas parellas pu ex parellas e aos tres menores foron asasinados en contextos de violencia de xénero, sumando xa 65 dende 2003. Igualmente, se explicou que o último informe do Observatorio contra a Violencia Doméstica e de Xénero do Consello Xeral do Poder Xudicial advirte dun incremento do 5 % nas denuncias en Galicia respecto ao ano anterior. Neste sentido, a encargada de ler o manifesto explicou que “vivimos nunha sociedade legalmente igualitaria, con un marco xurídico que nos sitúa á vangarda dos países do entorno, a nivel estatal e autonómico, pero onde as cifras de mortes e agresións contra as mulleres e as súas fillas e fillos continúan sendo abafantes”. Por iso, sinalou é tan importante “incrementar os esforzos para dar unha resposta integral ás vítimas e erradicar aquelas actitudes e comportamentos que reproducen a desigualdade e que están na orixe da violencia de xénero, contribuíndo a perpetúala”.

Acto na delegación da Xunta

A Delegación Territorial da Xunta en Lugo acolleu hoxe o acto de conmemoración do Día Internacional para a Eliminación da Violencia contra as Mulleres. As directoras territoriais de Medio Rural, Olga Iglesias, e de Emprego, Comercio e Emigración, Carmen José López, deron lectura á Declaración institucional na que o Goberno galego reafirma o seu compromiso “firme e sostido para previr, detectar e erradicar todas as formas de violencia contra as mulleres”, impulsando políticas transversais que alcancen todos os ámbitos. “A Xunta consolidou este ano a súa acción ao redor de tres eixos: prevención e detección, atención integral e independencia económica das mulleres vítimas” subliñaron durante o acto. E remataron dicindo que “identificar desigualdades, desmontar estereotipos e fomentar relacións de respecto e igualdade, para o que se traballa a concienciación nos espazos educativos, de cultura e lecer, e tamén nos espazos laborais”.

Os comercios lucenses interesados en participar no Mercado de Nadal poderán solicitalo ata o venres

Os comercios lucenses interesados en participar no Mercado de Nadal “Nadalmente Lucense” aínda están a tempo de presentar as súas solicitudes para formar parte dun dos eventos máis clásicos e tradicionais do inverno lucense, que se desenvolverá do 5 de decembro ao 5 de xaneiro na Praza Maior de Lugo. Ata o vindeiro venres, día 28, os negocios locais que desexen estar presentes de xeito gratuíto neste mercado poderán solicitalo no Rexistro Xeral do Concello de Lugo ou a través do rexistro electrónico da sede electrónica do Concello de Lugo www.lugo.gal.

Os negocios aos que va dirixida esta iniciativa son comerciantes ou artesáns locais, pertencentes aos sectores de artesanía e traballos manuais; decoración; alimentación e bebidas; produtos ecolóxicos e sostibles; roupa e complementos; regalos e souvenirs; xogos e xoguetes e flores e plantas.

Ademais de no Rexistro Xeral do Concello de Lugo ou a través do rexistro electrónico da sede electrónica do Concello de Lugo www.lugo.gal., tamén poderá realizarse a solicitude mediante os procedementos habituais establecidos polas administracións públicas. Neste último caso a persoa solicitante deberá comunicar, na mesma data na que presente a petición, mediante correo electrónico remitido á dirección cei@lugo.gal a presentación de dita solicitude.

Quendas e horarios

As casetas do Nadalmente Lucense cederanse por quendas, con catro diferentes que coinciden cunha semana de prazo. Do 5 de decembro ao 14 de decembro; do 15 de decembro ao 21 de decembro; do 22 de decembro ao 28 de decembro; e unha última quenda para a semana do 29 de decembro ao 5 de xaneiro. Para os cambios de ocupantes das casetas, esta deberá quedar valeira a entre as 21:00 e as 23:00 horas, para deixar paso a un novo negocio, que deberá ter a caseta totalmente montada entre as 8:30 e 10:00 horas do día de entrada.

Os horarios establecidos son, ao igual que outros anos, de 11:00 a 14:30 horas polas mañás, e de  16:30 a 21:00 horas, polas tardes, agás os días 24 e 31 de decembro, nos que o mercado funcionará unicamente en horario de mañá; e os días 25 de decembro e 1 de xaneiro, nos que permanecerá pechado. A programación presentada busca acompañar e enriquecer a actividade comercial cunha oferta ampla de propostas lúdicas, culturais e participativas, dirixidas a público infantil y familiar. Grazas a esta programación e á variedade de negocios e comercios, dende a área de Dinamización Económica preténdese crear un ambiente cálido, próximo e festivo que reforce a identidade do Nadal lucense e favorezca a presenza continua de visitantes na praza, garantindo que cada día conte con propostas atractivas e accesibles.

A adxudicación das casetas e quendas realizarase mediante sorteo público, e terá lugar o día 2 de decembro ás 10:00 horas no CEI NODUS, unha adxudicación de espazos que será publicada no Taboleiro de anuncios e na páxina web do Concello de lugo (www.concellodelugo.gal) antes do 3 de decembro.

Ao igual que en anteriores edicións haberá actividades paralelas nas casetas dedicadas ao Fogar de Santa Claus; na reservada ao emisario dos Reis Magos; unha cabana para albergar espectáculos e obradoiros e o poboado miúdo. Todo o recinto do mercado Naldalmente Lucense estará perimetrazo cun sistema de valado para evitar o tránsito accidental de viandantes polas zonas verdes e con plantación de flores da Praza Maior.

A TIC  súmase ao 25N cunha nova edición de “En Camiño contra as Violencias”

O Centro de Formación Audiovisual da Deputación sumouse á conmemoración do 25N coa sexta edición de “En Camiño contra as Violencias”, unha iniciativa organizada polo alumnado de 1º de Produción que tivo lugar este venres na Praza de San Marcos.  Alumnos e alumnas dos dous ciclos que se imparten no CFA participaron vestidos de negro e co rostro cuberto con máscaras cos nomes das 38 mulleres asasinadas no que vai de 2025. O silencio, en sinal de dó e de respecto polas vítimas, foi o gran protagonista desta actividade coa que os estudantes quixeron facer visible a súa repulsa contra a violencia machista. Unha alumna dixo, en nome dos seus compañeiros e compañeiras, que “hoxe estivemos en silencio, pero non calamos. Sabemos que a violencia machista non é unha noticia illada nin un problema privado. É unha lacra social que destrúe vidas, proxectos e futuro. Como xeración que constrúe o mañá, cremos na igualdade, na educación, no respecto e na liberdade”.

Mensaxes contra a violencia machista

Un alumno arrancou o acto lendo un texto dos estudantes no que afirman que “En Camiño contra as violencias” non é unha celebración, senón unha declaración, un recordo para as mulleres que xa non están e un compromiso coas que seguen vivas. “Para nós, o Camiño representa o movemento, a acción e a resistencia constante fronte a todas as formas de agresión, tanto as visibles como as soterradas”. Ademais, anunciaron que o compromiso da Escola irá moito máis aló desta actividade, xa que estará presente “en cada aula, en cada vídeo, en cada proxecto, en cada conversa e en cada decisión que tomemos”.

A actividade tamén incluíu un audio con mensaxes de alumnos e alumnas nas que desenvolveron a súa creatividade denunciado a violencia machista a través de diversas fórmulas, como a poesía ou o rap.

Práctica nun escenario real

“En Camiño contra as Violencias”, recolle cada curso as propostas dos alumnos e alumnas de 1º de Produción, que se ocupan tamén da súa organización. Trátase da súa primeira práctica nun escenario real, dentro do Módulo de Planificación de Espectáculos. Pero, ademais, na actividade implícanse todos os estudantes de Realización e Produción e o persoal do Centro.


Diario de información xeral sobre Lugo e a súa provincia
San Salvador de Muxa 124 27192, Lugo

WP Twitter Auto Publish Powered By : XYZScripts.com