Os feitos ocorreron pasadas as 16:40 horas desta tarde, e foi un particular quen alertou aos xestores do 112 Galicia de que un home sufrira un accidente nun monte situado en Viloudriz, na parroquia de Refoxo (Sober).
Os Bombeiros de Monforte chegaron rapidamente ao lugar e liberaron ao ferido levantando a árbore, tralo que foi evacuado ao hospital nunha ambulancia de Urxencias Sanitarias de Galicia-061.
Tamén se informou á Garda Civil e aos voluntarios de Protección Civil de Sober.
A catedrática de Estatística e Investigación Operativa Rosa Crujeiras converterase na primeira reitora da historia da Universidade de Santiago de Compostela (USC) tras resultar elixida nas eleccións ao reitorado con 1.397 votos ponderados. A outra candidata, a catedrática de Óptica Maite Flores, obtivo 721 votos ponderados, mentres que se rexistraron 148 votos en branco.
A proclamación provisional da reitora electa está prevista para o 12 de marzo. Entre o 13 e o 20 de marzo abrirase o prazo para presentar recursos ante a Comisión Electoral Central, e a proclamación definitiva terá lugar o 23 de marzo.
Crujeiras obtivo o apoio maioritario en todos os sectores da comunidade universitaria: 666 votos ponderados no Sector I (persoal docente e investigador con vinculación permanente), 150 no Sector II (resto do PDI), 424 no Sector III (estudantado) e 157 no Sector IV (Persoal Técnico de Xestión de Administración e Servizos). Pola súa parte, Flores acadou 414 votos ponderados no Sector I, 83 no Sector II, 169 no Sector III e 55 no Sector IV.
En canto á participación, emitíronse 9.664 votos. A porcentaxe de participación foi do 87,37% no Sector I, do 59,37% no Sector II, do 26,99% no Sector III e do 77,75% no Sector IV.
O actual reitor da USC, Antonio López Díaz, felicitou a Crujeiras polo resultado e desexoulle éxito no novo mandato, ao tempo que salientou a elevada participación nas eleccións, que considerou un elemento que reforza a lexitimidade da nova reitora.
Licenciada en Matemáticas pola USC en 2001, Crujeiras doutorouse en Estatística e Investigación Operativa en 2007 e realizou unha etapa posdoutoral na Université catholique de Louvain (Bélxica). A súa actividade investigadora céntrase no ámbito da estatística non paramétrica e conta con publicacións en revistas científicas internacionais.
Ao longo da súa carreira tamén desenvolveu actividade docente en distintas facultades da USC e participou na coordinación de programas de doutoramento. No ámbito da xestión universitaria ocupou diversos cargos, entre eles secretaria académica do Instituto de Matemáticas, vicedecana da Facultade de Matemáticas e vicerreitora. Entre 2021 e 2025 foi directora científica do Centro de Investigación e Tecnoloxía Matemática de Galicia (CITMAga).
A súa traxectoria científica foi recoñecida con diversos galardóns, entre eles o Premio ao Novo Talento Científico Feminino 2023 da Real Academia de Ciencias Exactas, Físicas y Naturales e o Premio á Mellor Contribución Metodolóxica en Estatística outorgado pola Sociedad de Estadística e Investigación Operativa (SEIO) e a Fundación BBVA en 2024.
A proxección e posterior coloquio dos videoclips finalistas aos XXIV Premios Mestre Mateo terá lugar mañá, 12 de marzo, ás 20.15 horas, no Salón de Actos do Pazo de San Marcos, coa participación de artistas e membros dos equipos de produción e realización dos audiovisuais.
O acto contará coa participación de Fran Fórneas e Sergio Marey, responsable do deseño de vestiario, do videoclip de “Ferido” de O Xoán; de Sara Faro e María Pérez, Fillas de Cassandra, nomeadas polo videoclip de “Hibernarse”; de Sabela Ramil e Paula Pereira, directora do videoclip “Non cho podo dar” e de Nuno García Pico e Xaime Miranda, director do videoclip de “Ontes fun moi malo” de Grande Amore. Conducirá e moderará o coloquio Laura Lamontagne, que tamén actuará durante o acto.
A actividade, gratuíta e con entrada libre, amplía a programación organizada nas últimas semanas pola Academia Galega do Audiovisual e a Vicepresidencia da Deputación de Lugo arredor da celebración en Lugo da XXIV Premios Mestre Mateo, que se entregarán por primeira vez en Lugo, no Auditorio Fuxan Os Ventos, o vindeiro 21 de marzo.
Fotografía: videoclip “Ferido”.
A Asociación para a Defensa Ecolóxica de Galiza (ADEGA) valorou a recente sentenza do Tribunal Superior de Xustiza de Galicia (TSXG) que desestima a solicitude de contracautela presentada pola Consellaría de Medio Ambiente da Xunta de Galicia contra a paralización cautelar das batidas de lobo nos concellos de Cerdedo-Cotobade, Curtis e Ferrol. A resolución xudicial considera que a petición da Xunta non estaba apoiada en datos científicos suficientes e, por tanto, mantén as medidas cautelares previamente adoptadas polo Tribunal Supremo.
A paralización das batidas deriva dun proceso xudicial iniciado por organizacións ecoloxistas, que impugnaron hai aproximadamente un ano a decisión da Xunta de volver autorizar controis letais sobre o lobo tras a exclusión da especie do Listado de Especies Silvestres en Réxime de Protección Especial (LESPRE). A iniciativa contou co apoio do Fondo para a Protección do Lobo Ibérico, promovido por diversas entidades ambientais e no que colaborou ADEGA.
Segundo o fallo da sección segunda da Sala do Contencioso-Administrativo do TSXG, a decisión xudicial baséase en varios criterios principais:
O tribunal sinala que, en determinadas circunstancias, pode contemplarse o control da especie.
Porén, indica que antes deben esgotarse todas as medidas necesarias para evitar ou paliar os danos ou riscos asociados á presenza do lobo.
Tamén apunta que as medidas de control propostas deben estar xustificadas con base no coñecemento científico e técnico, de modo que se poida acreditar a súa compatibilidade coa conservación da especie.
Ademais, subliña que, segundo o coñecemento biolóxico existente, a eliminación de exemplares pode nalgúns casos incrementar os danos, debido á estrutura social e ao comportamento das mandas.
Estes aspectos, segundo diferentes estudos científicos e técnicos sobre a especie, levan sendo analizados e debatidos na literatura especializada desde hai décadas.
Tras coñecerse a sentenza, ADEGA considera que as administracións públicas deberían revisar as políticas actuais de xestión do lobo en Galicia e orientar as súas actuacións cara a medidas baseadas na prevención e na investigación. Entre as posibles liñas de actuación mencionadas pola organización inclúense o reforzo de sistemas preventivos nas explotacións gandeiras, o estudo das mellores prácticas de manexo do gando e o seguimento da especie no territorio, incluíndo análises xenéticas que permitan actualizar o coñecemento sobre o estado das poboacións.
Segundo a entidade, unha xestión eficaz do conflito entre a conservación do lobo e a actividade gandeira require información científica actualizada que permita determinar o estado de conservación da especie e avaliar as medidas máis axeitadas en cada contexto.
O conflito arredor da presenza do lobo e a súa relación coa gandería leva décadas sendo obxecto de debate. Segundo lembran diferentes voces do ámbito ambiental e científico, esta cuestión xa foi abordada no Congreso dos Deputados a mediados da década de 1980, e desde entón mantense como un tema complexo no que conflúen intereses ambientais, económicos e sociais.
Neste contexto, algunhas organizacións consideran que a inclusión do lobo no LESPRE buscaba reforzar a base científica e técnica na xestión da especie e favorecer a procura de solucións de coexistencia entre a conservación da fauna salvaxe e a actividade gandeira.
Diversas entidades coinciden en que a cooperación entre administracións —tanto a nivel estatal como autonómico— e o diálogo co sector gandeiro son elementos clave para avanzar cara a modelos de convivencia que minimicen os danos ao gando e garantan ao mesmo tempo a conservación dunha especie considerada de alto valor ecolóxico.
O Plan de Mobilidade Urbana Sustentable (PMUS) aprobado polo goberno municipal de Partido Socialista Obrero Español (PSOE) e o Bloque Nacionalista Galego (BNG) establecerá as directrices da mobilidade en Lugo para os vindeiros anos. O documento inclúe diferentes medidas que poderán modificar aspectos como o tráfico, o aparcamento, o acceso aos barrios ou a organización de determinados espazos urbanos.
Entre as actuacións previstas destaca a ampliación da rede de carrís bici, que pasaría dos 12 quilómetros actuais a arredor de 47,4 quilómetros. O plan tamén contempla a eliminación duns 2.600 espazos de aparcamento en superficie e a creación de 15 novas zonas peonís en distintas rúas da cidade sen conexión entre elas.
Segundo o documento, estas peonalizacións realizaríanse en varios puntos da cidade e non estarían, a máis das veces conectadas entre si nin con outros itinerarios peonís ou de transporte público. Esta configuración podería introducir cambios nos desprazamentos habituais e no acceso a determinados barrios ou establecementos comerciais.
As modificacións contempladas no PMUS xa están a xerar diferentes reaccións entre a veciñanza. O novo modelo de mobilidade implicaría cambios na circulación e nas opcións de estacionamento en varias zonas da cidade, polo que o seu impacto podería ser visible en distintos barrios.
O documento completo do plan está dispoñible para consulta pública, o que permite coñecer con detalle as actuacións previstas e a planificación das distintas medidas.
👉 Descargar o Plan de Mobilidade de Lugo
Desde o Partido Popular iniciouse unha campaña informativa dirixida á cidadanía para dar a coñecer o contido do plan e as súas posibles consecuencias. Segundo indican desde esta formación política, o documento non foi sometido a debate no pleno municipal nin contaría, ao seu xuízo, coas garantías xurídicas necesarias.
A exposición pública do plan produciuse despois de que o Tribunal Superior de Xustiza de Galicia admitise a trámite un recurso contencioso-administrativo presentado polo Partido Popular e isto obrigou ao goberno Municipal a poñer a dalo a coñecer á cidadanía.
No marco desta campaña informativa, o Partido Popular está a organizar reunións abertas coa veciñanza e encontros con distintos colectivos que poderían verse afectados polas medidas previstas no PMUS. Entre eles atópanse asociacións de persoas con discapacidade, representantes do sector da distribución ou profesionais vinculados aos servizos de emerxencia.
Segundo explican os organizadores destas reunións, o obxectivo é recoller opinións e analizar como os cambios contemplados no plan poden influír no funcionamento da cidade e na mobilidade diaria.
Dentro desta iniciativa os populareas teñen previsto continuar coa organización de encontros informativos en distintos puntos da cidade para explicar o contido do plan. Así o mércores 11 ás 20.30 haberá una xuntanza para A Residencia na sede do PP ; en Fontiñas o día !2 xoves no centro Maruja Mallo e en san Roque o luns 16 ás 20.30 na Pizzería Bocalino.
Un amigo asombrouse de que eu viaxase co Imserso, por terlle quedado ao sistema a sona de que os participantes son vellos e fan cousas que se supoñen son ou foron de vellos, entrelas os bailes, xogos de cartas, karaokes, e monótonas tardes vendo pasar a vida por diante.
Non sei quen dixo, pero apúntome, que vello, o que se di vello, é o que supera os cen anos e o leva mal. Pois resulta que nestas viaxes hai participantes que case teñen que xurar que son xubilados, polo ben que o levan.
Medio cento de lucenses vivimos nun hotel de 4 estrelas da cidade de Alcudia, onde quen quixo cantou, bailou, xogou… e quen non (ou tamén) dedicouse a ver unha Mallorca ao noso dispor, ben distinta da do verán tomada ao asalto polos que só aprecian sol e praia. Eramos de Lugo, A Fonsagrada, Ribeira de Piquín ou Alfoz; xa non digamos de Vilalba, xa que o dez por cento eramos (Celeiro, Álvarez,Criado…) da Porta de Cima.
Esta é unha boa iniciativa a prol dos maiores, e non o digo porque me afecte senón por comprobalo en vivo e en directo. Para moitos, será a unica posibilidade de cambiar de aires; para o sector do turismo unha inxección de traballo en época baixa, e para o comercio afectado unha alegría en tempos dificiles.
“Que bos son, que nos levan de excursión!”, seica cantabamos os rapaces doutrora. Non digo que isto sexa bondade dos gobernantes por manter esta acción meritoria; sí é unha boa política a de organizar viaxes para os maiores, primando aos de menores ingresos, e aos que comecen a utilizar o sistema.
A quen non lle gusten as viaxes do Imserso, está no seu dereito de non ir. Pero é unha idea luminosa, necesaria e xusta.
A Unión Comarcal de CCOO de Lugo presentou alegacións ao proxecto de Orzamentos do Concello de Lugo para o ano 2026 ao considerar que a súa elaboración, especialmente no Capítulo I relativo ao persoal, se realizou sen negociación coa representación legal das persoas traballadoras.
Segundo indica o sindicato, o goberno municipal aprobou inicialmente as contas sen convocar a Mesa Xeral de Negociación nin facilitar previamente a documentación necesaria para que a representación sindical puidese analizar e debater as decisións relacionadas co persoal municipal.
Entre as cuestións sinaladas por CCOO atópase a inclusión no orzamento de partidas vinculadas á produtividade, á carreira profesional ou ás gratificacións. O sindicato apunta que non se detallan os criterios de reparto, os incrementos previstos nin o impacto que estas medidas terían nos distintos servizos municipais.
Ademais, CCOO lembra que continúan pendentes diversas cuestións de carácter estrutural que, ao seu xuízo, requiren planificación e negociación. Entre elas menciona a actualización da Relación de Postos de Traballo (RPT), a regulación da xornada en determinados servizos especiais, a elaboración e desenvolvemento do Plan de Igualdade ou o reforzo da formación vinculada á carreira profesional.
Nas alegacións presentadas, o sindicato solicita que se retrotraia o procedemento de aprobación do orzamento no relativo ao Capítulo I e á plantilla de persoal, co obxectivo de abrir un proceso de negociación coa representación sindical.
CCOO sinala que as decisións sobre a organización do traballo e as retribucións do persoal municipal deberían adoptarse, segundo a súa postura, con información e no marco da negociación colectiva. O sindicato tamén subliña a importancia do diálogo social nas decisións que afectan aos dereitos laborais e ao funcionamento dos servizos públicos municipais.
En terras relacionadas coa miña nenez, circulaba mediado o pasado século unha historia de amores nefandos, dos que se contaba que naceran pequenos monstros mestura de humano e cánido, que a familia se ocupara de facer desaparecer. Non se sinalaban persoas pero contábase como certo, quizais como aviso para evitar comportamentos bestiais. De pouco valía que os entendidos dixeran que na natureza era imposible que se deran eses desaxustes, e a historia escoiteina varias veces, antes e despois de entendela.
O achegamento dos humanos aos cánidos produciuse pola súa utilidade para a defensa, vixiancia, compañía…pero foi a pandemia de 2020 o que provocou o especial achegamento dos tempos actuais nos que os humanos precisamos máis acompañamento – axuda, ao fin – dos cánidos caseiros ca eles a nosa protección, co natural incremento da dependencia humana, que compensa aos animais con vestimenta, alimentación especial, atención sanitaria e, tras do final da vida do animal, dorida lembranza.
Podería pensarse que os “therians” aparecen por pura envexa dos coidados que os animais reciben ao ser considerados membros da unidade familiar, adoptando posturas e disfraces que lles dan apariencia do animal que quixeran ser. Pero o problema debe ser bastante máis profundo, tanto nos afectados como nos que contemplan este fenómeno que non será nefando, pero resulta moi raro.
Será imposible que os xenes de seres de distinto orden do reino animal xermolen para conformar unha entidade franquensteniana, pero vese que mentalmente as persoas poden camiñar por vieiros incógnitos que conducen a paraisos perdidos que ata agora coñeciamos polo nombre vulgar de “tolemia”.
As manifestacións convocadas pola Plataforma Feminista de Lugo e o Foro Feminista, cada unha coas súas reivindicacións, por mor de cuestións trans e da prostitución, reivindicaron este domingo nas rúas do centro da cidade o movemento feminista
As manifestacións reuniron a varios centos de persoas que responderon á chamada do movemento feminista para reivindicar igualdade, dereitos e paz. Consignas como “Alerta feminista”, ou Non nos conformamos, foron das mensaxes máis repetidas nesta soleada mañá de marzo en Lugo.
A mobilización desenvolveuse nun ambiente reivindicativo e combativo, no que as participantes —maioritariamente mulleres, pero tamén homes e persoas de diferentes idades— reclamaron a necesidade de manter a loita feminista activa fronte ás desigualdades que seguen presentes na sociedade. Con pancartas, bandeiras e cánticos, as narchas avanzaron polas rúas do centro de Lugo, ata o punto final da concentración.
Durante a marcha, a denuncia dos conflitos internacionais e das súas consecuencias sobre a poboación civil estivo moi presente. As manifestantes fixeron referencia ás guerras nas que están implicados Estados Unidos, Israel e Irán, lembrando que os conflitos armados teñen un impacto especialmente duro sobre as mulleres e a infancia.
Desde a Plataforma Feminista de Lugo insistiron en que o movemento feminista non só loita pola igualdade entre homes e mulleres, senón tamén por unha sociedade máis xusta, libre de violencia e comprometida coa defensa dos dereitos humanos. Para as organizadoras, a loita feminista está estreitamente ligada á defensa da paz e á denuncia das guerras que afectan a millóns de persoas en todo o mundo.
Como ramo á marcha, realizaronse intervencións para lembrar que o feminismo continúa sendo un movemento necesario para avanzar cara a unha sociedade máis igualitaria. As participantes destacaron a importancia de manter a mobilización social e de seguir saíndo ás rúas para facer visibles as reivindicacións do movemento.
Os Codex Cinema estrean hoxe venres 6 de marzo os filmes:
” CARAVAN”, que introduce mensaxes socialmente sensibles e humanos e fai un retrato honesto sobre a superviviencia.
Dirección: Zuzana Kirchnerová.
Sinopse: unha nai dun neno adolescente que ten síndrome de Down soña cunhas vacacións a soas na casa duns amigos en Italia; pero os plans fracasan e, acompañada polo seu fillo, fai unha viaxe persoal por unha Italia afastada da imaxe turística habitual.
“A SOMBRA DO MEU PAI”, historia dun pai ausente que se reúne cos seus dous fillos pequenos nun momento vital no que todo cambia.
Dirección: Akinola Davies.
Sinopse: a historia transcorre en Lagos, a metrópole nixeriana, durante a crise electoral de 1993. Un pai, ata agora ausente na vida dos seus fillos, pasa un día con eles percorrendo a inmensa cidade mentres a inestabilidade política pon en risco a volta a casa.
Asemade o domingo 8 de marzo ás 20:15h os Codex Cinema proxectará un pase do filme “As liñas descontinúas” na que estará presente a súa directora, Anxos Fazáns que ao finalizar á proxección fará un coloquio.
Diario de información xeral sobre Lugo e a súa provincia
San Salvador de Muxa 124 27192, Lugo
