Novas

Os Reis Magos de Oriente chegan a Lugo

Os Reis Magos de Oriente percorreron hoxe as rúas de Lugo. A cabalgata saíu ás 18 horas do parque da Milagrosa, continuando pola rúa Monte Faro e a avenida da Coruña e chegou á praza Maior ás 19:15. Estivo formada por varios espectáculos precedendo ás carrozas, ademais de música e espectáculos a cargo da Tambukda e Cántigas e Frores, cun percorrido no que se repartiron máis de 4.000 quilos de caramelos.

Melchor, Gaspar e Baltasar contaron hoxe con 4 carrozas, unha para cada un deles e outra para poder levar os agasallos de todas as nenos e nenos de Lugo. As súas carrozas ambientadas na temática desta cabalgata levarán ás súas maxestades ao fondo do mar, aos ceos e máis aló de onde rematan os mapas. Criaturas fantásticas acompañarán a cada un deles e un vello amigo desta cidade na súa versión máis xigantesca coidará de que non se perdan os agasallos.

Activado o operativo invernal ante a previsión de nevadas desde os 600 metros nas vindeiras horas

A Deputación de Lugo activou o seu operativo invernal ante a previsión de nevadas desde o 600 metros e de xeadas intensas a partir desta tarde especialmente no interior da provincia.

O dispositivo, que se despregará desde ás 17.00 horas, está formado, de partida, por 16 máquinas quitanieves, 8 pick ups con coitela, 8 vehículos todo terreo de apoio e 48 operarios, que traballarán para garantir a seguridade e a circulación nas estradas provinciais ao longo das vindeiras horas.

A institución conta  tamén con 12 silos de sal repartidos polo territorio (Ourol, O Valadouro, Riotorto, Lugo, Becerreá, O Incio, Pedrafita do Cebreiro, Folgoso do Courel, Cervantes, Navia de Suarna, A Fonsagrada e Ribas de Sil) e traballa de xeito coordinado coas 8 empresas dedicadas á conservación e mantemento da rede viaria provincial.

Unha persoa sofre queimaduras a causa dun incendio nunha vivenda en Láncara

Os feitos tiveron lugar sovre as 13:00 horas da tarde de onte nunha casa unifamiliar do Lugar de Río, en Láncara.

O 112 Galicia recibiu o aviso por parte do persoal do Distrito Forestal da zona e doutros alertadores, que axiña solicitaron asistencia médica para un señor que tiña queimaduras na cara.

Decontado, foron informados os profesionais de Urxencias Sanitarias de Galicia-061, que, finalmente, trasladaron o ferido.

Pola súa parte, os Bombeiros de Sarria fixeron fronte ao incendio, que afectou, fundamentalmente, á parte superior da vivenda, aínda que todo o inmoble sufriu as consecuencias do lume e do fume.

De momento, descoñecen as causa, pero os efectivos de extinción apuntan a un cortocircuito como a orixe do incendio.

No operativo tamén colaboraron os axentes da Garda Civil.

O PSOE de Lugo propón á alcaldesa de Burela para Presidenta da Deputación de Lugo

O Comité Provincial do PSdeG-PSOE de Lugo reuniuse este sábado en sesión extraordinaria para abordar a proposta formulada pola Comisión Xestora do partido e ratificou a súa decisión de propoñer á deputada provincial María del Carmen López Moreno como candidata socialista á Presidencia da Deputación de Lugo.

Durante a sesión, o Comité Provincial ratificou a proposta por aclamación, de conformidade cos estatutos e cos procedementos internos establecidos polo partido.

O acordo adoptado será agora remitido á Comisión Nacional de listas, que emitirá informe e reenviará á Comisión Federal de Listas para a súa aprobación definitiva, de acordo coas normas internas de elaboración e validación de candidaturas do PSOE.

A proposta definitiva será tomada pola Comisión Executiva Federal e remitida ao PSdeG-PSOE de Lugo para a súa aplicación de cara ao pleno do vindeiro 14 de xaneiro de 2026.

Para ser referendada haberá que agardar a que tanto o BNG como o Deputado non adscrito José Tomé apoien á candidata proposta polo PSOE.

Como é sabido os nacionalistas non queren ter ningunha relación con Tomé, e xa pediron ao PSOE que presionen ao alcalde de Monforte para que dimita como deputado. Así as cousas haberá que agardar as negociacións que de seguro se levaran a cabo estes días antes da votación que elixirá a nova dirección provincial.

A Xunta licita a ampliación do Instituto Muralla Romana de Lugo

A Xunta de Galicia vén de licitar as obras de ampliación do Muralla Romana, en Lugo.

O obxectivo da actuación é dar resposta ao incremento da matrícula de FP no centro e permitirá incrementar en case 900 m² a superficie do instituto. Para realizar a ampliación será necesario demoler unha edificación de 167 m² para levantar o novo volume, que terá unha superficie total de 892 m², dotado de planta Baixa, primeira e segunda e conectado co edificio existente a través dun corredor en cada unha delas.

O novo edificio contará cunha escaleira para comunicar os tres niveis. A planta baixa estará dotada de dúas aulas de clase, dúas aulas de apoio, un departamento de profesores e unha sala de comunicacións, mentres que a primeira e a segunda terán tres aulas e un departamento de docentes cada unha.

A ampliación mantén a mesma linguaxe arquitectónica que o edificio actual, con fachada de dobre folla de ladrillo con acabado exterior mediante sistema de illamento térmico SATE, a cuberta na zona das aulas será a dúas augas e a conexión entre o edificio existente e o novo resólvese cunha cuberta plana.

Falece un home en Lugo tras ser alcanzado por un camión

O accidente produciuse ás 17:30 horas desta tarde diante dunha vivenda no lugar de Labio, en Lugo.

Segundo relatou a persoa que chamou ao 112 para informar, o vehículo, un camión de dobre cisterna, atropelou o home e seguiu circulando. Tamén avanzou que pensaba que estaba falecido.

Pouco despois, co equipo de Urxencias Sanitarias de Galicia-061 xa no punto, confirmouse o falecemento e, agora, compróbase se a vítima residía no mesmo lugar onde foi atropelada.

Pola súa parte, os axentes da Policía Local e da Garda Civil de Tráfico recompilan toda a información sobre o sinistro co fin de coñecer todas as circunstancias do suceso.

Un ministerio de Vivenda ¿para que?

Todos as sondaxes da opinión pública demostran que a principal preocupación da cidadanía hoxe é o acceso á unha vivenda digna, de calidade e a prezo alcanzable polas rendas medias e modestas.

Os nosos pobos, vilas e cidades sofren unha tormenta perfecta: Hai pouco solo apto para construír; escasea a man de obra; medran os prezos dos materiais de construción; existe unha inseguridade xurídica nos propietarios, que provoca que non poñan as súas vivendas no mercado do alugueiro; e todo iso con máis burocracia e excesivos impostos.

O problema é claro: Temos máis demanda que oferta de vivenda, polo que a solución máis efectiva é a de incrementar a oferta de dispoñible no mercado. Hai administracións que están afrontando este reto e outras non.

Dende a Xunta de Galicia, conscientes desta problemática, están a traballar  desde o primeiro día da Lexislatura cun claro obxectivo, planificado, orzamentado, consensuado co sector: 3.000 novas vivendas públicas xa están en marcha en Galicia, ás que se sumarán 1.000 máis no 2026. Cúmprese o reto marcado polo presidente Alfonso Rueda de duplicar o parque público de vivenda de 4.000 a 8.000 fogares. Lugo é un bo exemplo deste esforzo.

Magoa que o Goberno Sánchez non demostre o mesmo grado de compromiso.  A pesar de dispoñer dun ministerio específico para a vivenda, non se está a traducir en melloras para o acceso a un fogar para as familias galegas. De feito recoñece en resposta escrita que o Estado non entregou ningunha vivenda pública en Galicia ou na provincia de Lugo.

Os senadores do PP preguntamos ao Goberno que ten previsto facer coas vivendas da súa propiedade, tanto as vinculadas ás antigas estacións ferroviarias como as que son propiedade do banco malo, da SAREB. O Executivo de Sánchez recoñecía que tiña máis máis de 200 vivendas na provincia de Lugo que, adaptadas, poderían destinarse a venda ou alugueiro. Pero o goberno non quere facelo.

Hai dúas forma de gobernar. A da Xunta, que cumpre. E a do Goberno Sánchez, que incumpre todo o prometido. Nós seguiremos traballando para crear máis oportunidades para as familias galegas. Seguiremos traballando para promover reformas normativas eficaces contra os casos de okupación fronte aos que o Goberno Sánchez non actúa. Seguiremos esforzándonos por dar resposta ás demandas da cidadanía, en pobos, vilas e cidades. Todos merecen poder acceder a unha vivenda nas mellores condicións.

Jose Manuel Balseiro Orol, Senador do PP de Lugo

Esta tarde os Codex Cinema estrean o filme “Vida Privada” protagonizado por Jodie Foster

Os Codex Cinema estrean o filme protagonizado por Jodie Foster “Vida Privada”. Un filme dramático con tintes cómicos que recorda ás películas de Woody  Allen.

Sinopse: a recoñecida psiquiatra Lilian Steiner emprende unha investigación privada sobre a morte dunha das súas pacientes, pois está convencida de que foi asasinada. Afonda así nunha rede de secretos que afectan a varias xeracións…

 

Tomé e García Porto reprobados cos votos de PP e BNG

No pleno celebrado hoxe na Deputación de Lugo, foron reprobados, a petición dos populares, o xa e expresidente da Deputación José Tomé e  a deputada Pilar García Porto, un por presunto acoso sexual e a deputada por intentar tapar as denuncias que se fixeron na canle interna do PSOE de Lugo.

Na súa exposición da proposta o  portavoz do PP na Deputación  Antonio Amejide acusou a Tome de non querer abandonar o cargo a García Porto de “encubridora. Tamén estendeu as súas acusacións A exalcaldesa Lara Méndez e a Gómez Besteiro.

Ameijide tamén cargou contra o BNG quen como afirmou, “segue inmerso nun dilema ao que non dá resposta: se están dispostos a formar parte dun goberno para o que precisa o apoio imprescindible de José Tomé e Pilar García Porto, aos que acabamos de reprobar”

Os populares preguntaron aos responsables do BNG “como van a mirar á cara das mulleres e homes que os votaron, mentres pactan con presuntos acosadores sexuais e con quen recoñeceu hoxe publicamente que o sabía todo e non fixo nada ata que saíu na televisión”

Coa renuncia de Tome como presidente da Deputación, o Vicepresidente Castro exercerá estas un funcións ata o vindeiro pleno que está convocado para o día catorce de xaneiro

Hipólito Xeada, de Alfoz, gañador do XXXVI Certame Galego de Arte do Belén de Begonte

Na mañá de hoxe, martes, reuniuse na Sala de Arte da Delegación Territorial da Xunta de Galicia en Lugo, o xurado do XXXVI Ceretame Galego de Arte “JOSÉ DOMÍNGUEZ GUIZÁN”, In memoriam de Manuel Gulín Rodríguez, composto por:

Aurelia Balseiro García, Directora do Museo Provincial de Lugo; Gonzalo Sánchez Folgueira, “Zalo”, pintor; Javier Arias Fouz, Delegado Territorial da Xunta de Galicia en Lugo; Xulio Xiz Ramil, Presidente do Centro convocante e Sonia Varela García, da Comisión de Cultura do centro cultural convocante, que actúa como secretaria, e acordou emitir o seguinte fallo:

O PREMIO JOSÉ DOMINGUÉZ GUIZAN, dotado con 2.000€ e diploma foi adxudicado á obra “A ilusión do Nadal”, de Hipólixo Xeada, de Alfoz, na que conseguiu reflectir á perfección o ambiente do Belén de Begonte.

Pola calidade dos traballos presentados, o Xurado acordou conceder Mención de Honra a cada unha das seguintes obras:

– “A Chaira”, de Manuel Carballeira Rivas, de Valdoviño

– “Huellas del tiempo”, de Andrés Gabarres Cagiao, de Ferrol

– “Otoño en la ciudad”, de Santiago Lago “Canzobre”, de Ferrol

Os premios serán entregados no decurso do acto de clausura do Belén de Begonte, o próximo 31 de xaneiro de 2026.

A exposición das obras presentadas pode ser visitada na Sala da Delegación Territorial da Xunta de Galicia en Lugo ata o próximo 14 de xaneiro. Desde o 15 ao 30 de xaneiro, estarán expostas na Casa da Cultura do Concello de Begonte.

Fotografía: Premio José Dominguez Guizán.

 


Diario de información xeral sobre Lugo e a súa provincia
San Salvador de Muxa 124 27192, Lugo

WP Twitter Auto Publish Powered By : XYZScripts.com