O vicealcalde de Vilalba anunciou esta mañá a posta en venda das seis parcelas de titularidade municipal que formaban parte do plan de ampliación de Entrepinares. En conxunto, as leiras suman 5.600 metros cadrados e poranse á venda mediante subasta, sendo a máis grande de 1.052 metros cadrados e as dúas máis pequenas de 860,80. O prezo do metro cadrado partirá dos 48,8 euros máis IVE.
O vicealcalde tamén anunciou que os trámites no prego de bases do concurso foron simplificados para favorecer a implantación de empresas. No anterior concurso, os interesados, para poder formar parte da poxa, debían acreditar a constitución dunha garantía por valor do 5% do importe do prezo inicial (excluído o IVE) e no caso de concorrer á poxa por máis dunha parcela, estes debían constituír a correspondente por cada unha delas. “Eliminando a garantía, buscamos unha maior participación e evitar que este concurso quede deserto nun contexto de evidente demanda de chan industrial”, declarou.
As ofertas polas parcelas deberán presentarse “dentro do prazo dun mes contado a partir do día seguinte á publicación do anuncio de licitación no Perfil do Contratante do Concello de Vilalba”, comunicou o vicealcalde.
