Novas

Correos renova a súa campaña para o envío de castañas en Lugo

Correos puxo en marcha na provincia de Lugo a súa campaña especial destinada ao envío de castañas para que os cidadáns manden este produto por paquetería a calquera punto da península.

A campaña prolongarase ata finais de novembro nas oficinas postais de Becerreá, Chantada, Escairón, Quiroga, Samos e Sarria. Ademais do envío desde a oficina postal, os veciños contan cos propios carteiros rurais destas zonas, que van recollendo ao paso os paquetes co produto e trasládanos ás oficinas de cabeceira.

Tendo en conta que se trata de produtos alimentarios, o servizo de Correos está pensado para que a entrega realícese con urxencia e efectividade. Os cidadáns poderán introducir neste paquete a cantidade de produto que desexen, coa recomendación de que o sequen ben.

Correos ofrece para eles un prezo reducido con descontos respecto a a tarifa estándar desta modalidade de paquetería. O cliente pode elixir o lugar de entrega (domicilio, empresa, local comercial, oficina de Correos…) e inclúe ademais notificacións SMS e de correo electrónico para o destinatario. Todos os envíos contan cun seguro especial incluído.

Pop/Rock e novas músicas, dende hoxe na Sala Tebras

Caldiae Factoría Cultura acolle hoxe, a partir das 20.30 horas, o Festival Músicas Diversas. Unha nova proposta da empresa que se prolongará durante a fin de semana e polo que pasarán grupos emerxentes e de contrastada calidade que chegarán á cidade da Muralla dende distintas partes de Galicia.

Así, hoxe e mañá (29-30 outubro) terá lugar na Sala Tebras un festival de Pop/Rock e novas músicas con grupos emerxentes e de contrastada calidade de diferentes partes de Galicia.

O Festival Músicas Diversas ofrece unha mostra dos diferentes estilos musicais que se están a desenvolver en Galicia por novos creadores que apareceron nos últimos tempos. Música pop, rock, cantautores, músicas do mundo, swing, blues desfilarán polo escenario da Sala Tebras a vindeira fin de semana.

Programa

Venres 29 de outubro
Os lucenses Silvia Chigliak e Adrián Arias, dúo que xa pasou nalgunha ocasión polo escenario do Vexetarian restaurante, abrirán este festival versionando os meirandes éxitos de diferentes estilos e épocas en piano e voz.

Tamén hoxe será o turno do lugués Saulo Sause que se une ao británico Paul Baker, vedciño da Ribeira Sacra, e que levan á Sala Tebras un son moi especial típico das illas inglesas.

Le Barluthier chegarán a Lugo dende Vigo, cun dshow típoco de pianobar e que leva ao oínte nunha viaxe no tempo. En concreto, os anos 30,40 e 50 serán o leitmotiv da súa proposta musical baseada no jazz, swing, dixie ou latin nun espectáculo cómico que vai máis aló do musical.

Por último, neste 29 de outubro, poñerán o broche de ouro a esta xornada do festival o trío Barbaña Blues, que chega desde Ourense coas súas versións de blues americano reinterpretando aos clásicos dun xeito moi persoal.

Sábado 30 de outubro
O Grupo coruñés FUA é un cuarteto de corda pouco convencional. A pesar de que os seus integrantes teñen unha formación clásica, o principal obxectivo do grupo é o de facer versións de música moderna cunha agrupación de cuarteto clásico, achegando así estes instrumentos a un público máis amplo.

A banda KAF! formada por músicos de O Porriño e Mos darán conta dos seus novos temas nos que levan traballando desde o ano 2020.

Dende O Grove, Carolina Rubirosa é unha das artistas emerxentes do panorama musical galego cunha importante traxectoria as súas costas; ten compartindo escenario e gravando traballos con artistas como Coque Malla ou Andrés Calamaro. Gravou coa Real Filharmonía de Galicia e gañou varios concursos musicais como o «Revolution Unplugged» de Europa FM.

Os composteláns Sr. Salvaje parte de sons que recordan ao rock estatal de toda a vida, sen esquecer os seus grandes referentes do rock americano dos anos 70. Rock&Roll tradicional, con toques Hard e en castelán que é fiel herdanza da bagaxe musical deste país. SR. SALVAJE crea e constrúe un son directo, visceral e con clase, traballando dende a idea de liberdade e autenticidade. Unha banda sen trampas nin curvas. Un concepto romántico de banda de rock and roll.

O festival dará comezo ás 20.30 horas nas dúas xornadas e poderáse gozar dende 6 euros cada día con dereito a unha consumición.

Máis información dos grupos na páxina web: http://caldiae.gal/concertos

Campaña solidaria para axudar á muller que perdeu a súa casa nun incendio

O Concello de Antas de Ulla pon en marcha unha campaña solidaria coa fin de canalizar as axudas á muller que o pasado domingo perdeu a súa vivenda nun incendio. María Fuertes, propietaria do inmoble, facilita un número de conta no que as persoas que o desexen poden facer os seus donativos. ES11 0238 8248 7607 0065 4679. Banco Santander.

A determinación de abrir unha campaña de solidariedade con esta veciña tomouse despois de comprobarse o alcance dos danos, que deixaron a vivenda totalmente arrasada polas lapas. A casa era de madeira e quedou inservible. María atópase aloxada nun establecemento da localidade, á espera de poder trasladarse a outra vivenda.

O Concello de Antas de Ulla agradece a colaboración dos veciños e veciñas ante unha situación de especial vulnerabilidade. Se alguén quere facer outro tipo de doazón, que non sexa monetaria, pode dirixirse aos servizos sociais do Concello de Antas de Ulla.

Un escape way amosará o patrimonio de seis concellos do Camiño de forma lúdica

A Delegación Territorial da Xunta en Lugo acolleu hoxe a presentación da iniciativa The Escape Way, que se desenvolverá en seis concellos do Camiño Francés da provincia de Lugo, en concreto os de O Cebreiro, Samos, Triacastela, Paradela, Portomarín e Monterroso. Está promovida pola Asociación de Municipios do Camiño de Santiago e conta cunha achega de 7.500 euros da Vicepresidencia primeira e Consellería de Presidencia, Xustiza e Turismo.

Na presentación participaron o delegado territorial da Xunta en Lugo, Javier Arias; a comisaria do Xacobeo 21-22, Cecilia Pereira; e en representación da entidade promotora, a alcaldesa de Triacastela, Olga Iglesias -membro da xunta directiva da Asociación-, a alcaldesa de Monterroso, Rocío Seijas, o alcalde de Samos, Julio Gallego, e o tenente de alcalde de Portomarín, Pablo Rivas.

Cada un dos concellos participantes contará co seu propio xogo, dispoñible a partir do sábado a través dunha aplicación de descarga gratuíta. Conxuga a plataforma tecnolóxica con elementos físicos, de forma que só é posible xogar sobre o terreo. O obxectivo é que os visitantes percorran as rúas e se acheguen ao patrimonio e aos lugares de interese mentres resolven o enigma proposto.

Todos os xogos son distintos, con diferentes probas creadas expresamente con elementos propios do concello, polo que cada caso resulta unha experiencia única. Ofrecen contidos en varios formatos, como vídeos, fotografías, textos, ilustracións ou locucións e están deseñados para unha duración aproximada de entre 40 e 90 minutos.

O delegado territorial gabou a proposta e subliñou que “resulta atractiva para persoas de todas as idades e moi especialmente para os máis novos, facilitando unha aprendizaxe lúdica da historia e da cultura da ruta xacobea”.

A asociación promotora é unha entidade sen ánimo de lucro constituída por máis dun cento de municipios españois no Camiño Francés, nos que está a estender esta alternativa tecnolóxica de ocio e de promoción da ruta.

Os fondos Next Generation, a análise nun foro de CEL e ABANCA con empresas lucenses

Un total de 33 representantes de empresas do Consello Asesor da Confederación de Empresarios de Lugo (CEL) déronse cita hoxe nun encontro empresarial organizado pola propia CEL e patrocinado por ABANCA para analizar os fondos Next Generation EU.

O encontro, organizado baixo o título “Foro Empresa 2021. Next Generation: retos e oportunidades”, buscaba achegar estes fondos comunitarios ás empresas lucenses, analizando que oportunidades presentan para as pequenas e medianas empresas e favorecendo o debate sobre cuestións de interese transversais para o tecido empresarial lucense.

Mónica Gondar Álvarez, directora da área Next Generation de ABANCA, foi a encargada de analizar en detalle os novos fondos e o Plan de Recuperación, Transformación e Resiliencia estatal, o instrumento gobernamental a través do cal se traza a folla de ruta para o investimento dos fondos comunitarios para a recuperación económica, de acordo cos obxectivos que marca a propia Comisión Europea para a modernización da economía dos países membros.

Gondar Álvarez achegouse aos diferentes compoñentes dos fondos e a súa chegada ao sector privado, ademais de repasar as convocatorias publicadas máis relevantes así como as que está previsto saian ao longo dos próximos meses. Entroutras cuestións, resaltou a relevancia da cooperación entre empresas para un maior éxito no acceso a estas axudas.

Igualmente, fixo referencia ao papel e traballo que están a realizar as entidades bancarias e, en concreto, ABANCA, en relación aos Next Generation EU, así como os produtos específicos creados para materializar estes fondos. O encontro, que incluíu un xantar de traballo, tivo lugar no establecemento de turismo rural Casa Toirán, situado en Láncara, e contou coa presenza de representantes de empresas como Alibós, AMSLab, Embutidos Montepicato, Farmadismo, ICM, Cafés Candelas, Naturleite, Magnesitas de Rubián, Maferliz, Macrocopia, Megaro Foods, Grupo El Progreso, Grupo Norbel, Álvarez Real o Medrar Solutions, entre otros.

Vilalba destinará 350.000 euros a axudas para autónomos e empresas

O Concello de Vilalba informa da publicación das bases das axudas para autónomos e empresas afectados polo peche obrigatorio das súas actividades debido á COVID-19. As bases recóllense no Boletín Oficial da Provincia (BOP) de Lugo de hoxe, xoves 28 de outubro de 2021.

Esta liña de axudas diríxese a aquelas empresas ou autónomos/as do municipio que tiveron que pechar os seus establecementos nalgún momento dende que se declarou o Estado de Alarma de marzo de 2020 ou outras medidas restritivas posteriores aplicadas dende o Estado ou pola Comunidade Autónoma para xestionar a crise sanitaria.

O Concello de Vilalba pretende con estas axudas protexer e apoiar ao tecido produtivo e social do municipio, atenuando así as consecuencias negativas do peche de negocios e da implícita baixada de ingresos neste período, dando pulo á recuperación económica.

En total, o concello de Vilalba destinará 350.000 euros a esta liña de axudas. Establécense varios grupos beneficiarios destas axudas, en función do tipo de negocio, cuxos importes son de 850, 1.300, 2.000 e 5.000 euros. Poderán percibir estas axudas as empresas ou autónomos/as cuxas actividades estivesen afectadas polas restricións sanitarias, detallándose este requisito no Anexo I da convocatoria. A súa facturación anual non pode superar os 500.000 euros, agás nos negocios de hostalaría que superen os 10 empregados. No caso dos autónomos/as, deberán estar afiliados como tal dende, como máximo, 8 meses despois do 14 marzo de 2021, e continuar de alta na actualidade. Tanto o domicilio fiscal como o centro de traballo deben estar ubicados en Vilalba.

O modelo de solicitude destas axudas está dispoñible na web www.vilalba.gal, debendo presentarse a través da Sede Electrónica do Concello de Vilalba. O prazo para solicitar estas axudas rematará 20 días despois da súa publicación no Boletín Oficial da Provincia de Lugo, é dicir, o mércores 17 de novembro de 2021.

Estas axudas resolveranse por orde de rexistro de entrada, sempre e cando o solicitante cumpra cos requisitos da convocatoria. As bases completas están dispoñibles no BOP do 28/10/2021: http://deputacionlugo.gal/sites/deputacionlugo.org/files/inline-files/28-10-2021.pdf#page=17

Lara Méndez lanza unha mensaxe á mocidade para que loiten por unha igualdade, real e efectiva “para non dar pasos atrás”

A alcaldesa de Lugo, Lara Méndez, reivindicou onte a “necesidade dunha igualdade, real e efectiva” ante os alumnos e alumnas de 4º da E.S.O e 1º de B.A.C de diferentes institutos de Lugo, aos que lle mandou unha mensaxe sobre a súa corresponsabilidade para “que non se dean pasos atrás na consecución desa igualdade, dereitos que tanto custou acadar, polos que moitas mulleres perderon a vida e que corren serio risco de perderse”.

A rexedora mantivo este encontro coa mocidade na presentación do ‘Libres e Vivas’ no Auditorio Municipal Gustavo Freire.

Ao acto de presentación tamén asistiu a Concelleira de Muller e Igualdade, Silvia Alonso; o Director da Editorial Galaxia, Francisco Castro, así como María López Sández e María Xosé Porteiro, autoras participantes do volume cun obxectivo común “lanzar unha mensaxe para concienciar sobre a necesidade de erradicar a violencia machista desde idades temperás e dar a coñecer os recursos de prevención”,  explicou a alcaldesa, que lembrou que desde o ano 2003, ano no que se comezaron a contabilizar os crimes machistas, foron asasinadas 1.114 mulleres en toda España, 66 delas en Galicia.

‘Libres e vivas’, é unha obra que aborda a cuestión do machismo, terrorismo patriarcal contra as mulleres, da liberdade e da igualdade e non debemos esquecer que “a violencia machista é unha guerra, e con cada vítima perdemos unha batalla”, sostivo Lara Méndez.

A Concellería de Muller e Igualdade, que asumiu á edición de 2.000 exemplares da obra, puxo en marcha esta iniciativa para, a través da literatura, chegar aos máis novos e novas co obxectivo de avanzar na igualdade e no rexeitamento de todas e cada unha das formas de violencia contra as mulleres.

“Dez relatos libres coma coiteladas directas á conciencia. Querémolas. Quérense. Todas. Libres e vivas. Detrás de cada unha delas hai unha historia de dor e inxustiza que alimenta a crenza de moitos homes de que teñen dereito a exercer o control e a violencia contra as mulleres”, sinalou a edil Silvia Alonso lembrando o prólogo do libro, ao tempo que animou aos mozos a “enviar ao mail da concellería: igualdade@lugo.gal unha valoración persoal tras a súa lectura”.

Francisco Castro, Director da Editorial Galaxia, agradeceu persoalmente á rexedora lucense o “compromiso en materia de igualdade do Concello de Lugo, moi necesario nestos tempos”, así como a man tendida da concelleira de Muller e Igualdade “pola axuda para sacar adiante unha xornada tan fructífera”.

Ao final do acto, as autoras, María López Sández e María Xosé Porteiro procederon a firmar exemplares a todos os asistentes que así o desexaron, ao tempo que animaron a ler a obra e realizar unha reflexión final de cada un dos relatos.

Sinopses de LIBRES E VIVAS

Levan dicíndonolo dende que o ser humano está sobre a Terra. Que non queren ser vítimas. Mais tampouco escravas. Compañeiras. Iguais. Mulleres e homes nun mundo xusto en Igualdade. Sobre estes parámetros pedímoslle a dez escritoras de primeiro nivel das nosas letras que abordasen a cuestión do machismo, do terrorismo patriarcal contra as mulleres, da liberdade, da Igualdade, para que, dende a literatura, entendamos como é o seu sentir. O resultado é este volume que tes entre as mans. Dez relatos libres coma coiteladas directas á conciencia. Querémolas. Quérense. Todas. Libres e vivas.

O PP pide explicacións a Méndez por pasar un ano sen facer as correccións para aprobar o 5% do PXOM

O Partido Popular quere que a alcaldesa, ou en quen delegue, infórmelles, nun prazo dunha semana como máximo, dos motivos polos que imos acabar este 2021 sen completar o 5% do PXOM, as causas polas que non se abordou aínda a reforma do PEPRI e que explique porque seguen dilatándose a tramitación de licenzas. Os populares abordaron nunha reunión coa APEC este asunto así como as diferentes propostas que benefician a este sector en materia de política fiscal.

No trascurso deste encontro o viceportavoz popular Antonio Ameijide e os concelleiros Manuel López e Rafael Pérez Prados explicaron que lle enviaron unha carta á alcaldesa para que se reuna ela, ou a persoa na que delegue, con representantes do Grupo Popular para que lles explique cales son as prioridades do bigobierno en materia de urbanismo “queremos coñecer os prazos que baralla para resolver cuestións vitais que desbloqueen o desenvolvemento urbanístico de Lugo”.

Ameijide puntualizaba “solicitámoslle a Lara Méndez, por escrito, que antes do próximo mércores convóquenos de forma presencial para explicarnos que se fixo para resolver diferentes cuestións urbanísticas que aparentemente “parece que seguen gardadas nun caixón”. Un exemplo desta desidia en materia urbanística é o do Plan Xeral “que leva tramitándose desde hai máis de dúas décadas sen que, sorprendentemente, háxase concluído o expediente”. Os populares lembran como o Concello non emendou a día de hoxe a listaxe de deficiencias detectadas pola Xunta no 2011 e que a administración autonómica volveu reclamar no 2013, o 2016 e o 2020. O último requirimento da Xunta para completar información, con data do 13 de outubro de 2020, segue sen responderse “o concello non entregou nin un só papel para emendar os erros”.

Ameijide pídelle á alcaldesa que teña “a consideración” de informar o grupo municipal do PP cuxo apoio foi vital sacar adiante este plan urbanístico” xa que o seu socio de goberno rexeitou a súa proposta. “A señora Méndez, ou a persoa na que delegue, debería ter a deferencia e a humildade de informarnos en que punto se atopa e cal é a previsión que ten para aprobalo ao 100%. “O PP actuou con sentido da responsabilidade nun asunto relevante para o futuro da cidade e por ese motivo debería darnos conta de como se está resolvendo o 5% pendente de aprobación”.

Os populares conclúen que “o urbanismo en Lugo con Lara Méndez á fronte é sinónimo de caos e parálise” lembrando que nos case 23 anos de PSOE no goberno “pasaron 8 concelleiros responsables (Besteiro, Liñares, María Novo, Luís Álvarez, Daniel Piñeiro, Miguel Couto, Álvaro Santos e agora Paula Alvarellos) así como un super coordinador de urbanismo (interventor) e os problemas seguen sendo os mesmos ou mesmo han emperorado.

Por último, o viceportavoz Antonio Ameijide e os concelleiros Manuel López e Rafael Pérez tamén anunciaron que pedirán que se recupere a atención presencial, de forma inmediata no departamento de urbanismo co ánimo de axilizar as xestións que agora se complican e eternizan moito máis que antes do covid.

O Concello realiza probas de maniobrabilidade nas obras da ronda

Na mañá de hoxe, persoal técnico municipal e da empresa concesionaria do transporte público desprazáronse á rúa Cidade de Viveiro para realizar novas probas de maniobrabilidade do bus urbano. Desde a área de Mobilidade búscase garantir a mellora accesibilidade tanto para as persoas como para os vehículos nos novos itinerarios do centro da cidade resultantes da obra de humanización da Ronda da Muralla, na zona sur.

Desde a área de Mobilidade trabállase para garantir a maniobrabilidade de todo tipo de vehículos que circulan por estas zonas. O edil de  Infraestruturas estivo presente esta mañá nas probas realizadas cun vehículo de 15 metros de longo adicado ao transporte de pasaxeiros, xa que o paso deste tipo de vehículos por estas rúas acontecerá poucas veces ao ano.

Coas probas realizadas hoxe, a área de Mobilidade avanza na recuperación da normalidade no tráfico rodado no centro da cidade, unha vez rematen as obras de humanización do treito da rúa Santiago á Rúa Vilalba.

O Goberno compromete 558M€ para consolidar Monforte como nó de comunicacións

O delegado do Goberno en Galicia, José Miñones, repasou hoxe os compromisos do Executivo con Monforte de Lemos, con actuacións que superan os 558 millóns de euros, para consolidar o papel deste concello como “nó de comunicacións e motor da economía da provincia de Lugo e de Galicia”.

José Miñones desprazouse á capital da comarca de Terra de Lemos acompañado da subdelegada do Goberno en Lugo, Isabel Rodríguez. Alí foron recibidos polo alcalde de Monforte, José Tomé, con quen supervisaron o estado dos proxectos e investimentos do Estado en Monforte.

O delegado apuntou que “o Goberno responde á relevancia de Monforte cuns investimentos que están á altura do concello”. E destacou que Monforte “é agora protagonista do maior investimento do Goberno en Galicia tras finalizar a construción da Alta Velocidade” con 546 millóns de euros para a modernización do corredor ferroviario entre Ourense e Lugo. Adif executará nos próximos tres anos 71 contratos para poñer ao día a liña e conectala coa alta velocidade que pasará por Ourense. “Nestes momentos xa se atopan en execución a renovación da vía entre Monforte de Lemos e Lugo e o túnel de Oural, que suman máis de 80 millóns de euros”.

Dentro deste proxecto, José Miñones lembrou que esta semana Adif adxudicou a adecuación da estación de tren de Monforte ás novas condicións do corredor. E engadiu que son “3 millóns de euros para a renovación completa deste equipamento” aos que haberá que sumar os 6 millóns previstos para a supresión dos primeiros pasos a nivel do municipio, que configurarán un novo espazo urbano nesta área de Monforte.

Reserva da biosfera da Ribeira Sacra
José Miñones apuntou que este ano o Ministerio para a Transición Ecolóxica e o Reto Demográfico destina 6,4 millóns de euros para financiar proxectos de desenvolvemento sostible nas Reservas da Biosfera, e que Monforte de Lemos poderá beneficiarse deles unha vez que a Ribeira Sacra accedeu en setembro a esta figura de protección. Este compromiso traducirase en iniciativas enfocadas cara o emprego verde e asentadas no territorio, co que se obterá tamén un efecto positivo sobre a poboación asentada neste espazo.

Investimentos en sostibilidade ambiental
O delegado apuntou que a mellora ambiental e da calidade de vida da poboación de Monforte de Lemos recibe preto de 5 millóns de euros do Goberno de España. En concreto, Monforte beneficiouse de 2,8 millóns de euros das axudas do Ministerio para a Transición Ecolóxica cos que está abordando a renovación da iluminación pública. Este investimento permite ao Concello substituír máis de 5.000 puntos de luz por puntos LED co que consigue un importante aforro en consumo de electricidade e, ao tempo, unha diminución das emisións á atmosfera derivadas deste consumo.

Xunto á eficiencia enerxética, o Goberno, a través da Confederación Hidrográfica do Miño-Sil, está abordando co Concello a renovación do saneamento e depuración das augas. Tras a execución da primeira fase, ambas administracións abordan xa a segunda, para a que a CH Miño-Sil comprometeu 1,9 millóns de euros e a tramitación dos contratos. “Nestes momentos xa estamos a traballar para definir as necesidades e redactar o proxecto, paso previo á súa licitación”, indicou o delegado.


Diario de información xeral sobre Lugo e a súa provincia
San Salvador de Muxa 124 27192, Lugo

WP Twitter Auto Publish Powered By : XYZScripts.com