O Grupo Popular manifestou o seu apoio ás reivindicacións da veciñanza das zonas de Camiño Romai e Casas Vellas en relación coa situación existente no cruce de Casas Vellas, Ponte Romai e rúa da Soidade, no municipio de Lugo.
Segundo se expón, hai máis de medio ano produciuse a rotura dun colector neste punto, o que estaría a provocar un vertido continuado de augas fecais ao río Rato. A situación é cualificada como preocupante desde o punto de vista ambiental.
Ademais, sinálase a existencia dun socavón e de fendas na calzada que poderían afectar á estabilidade da vía. Trátase dun tramo con tráfico habitual, empregado como acceso ao polígono industrial do Ceao desde Ponte Romai.
A veciñanza presentou escritos tanto no Concello como na Confederación Hidrográfica do Norte para advertir da problemática. Segundo indican, a actuación realizada ata o momento consistiu na colocación de valado provisional na zona.
O Grupo Popular anunciou a presentación dun rogo ao pleno municipal co obxectivo de instar á adopción de medidas urxentes que permitan reparar o colector, poñer fin ao vertido e garantir a seguridade na vía afectada.
