A Xunta de Galicia destinará este ano máis de 6,5 millóns de euros ao impulso do sector audiovisual galego. Así o anunciou o delegado territorial da Xunta en Lugo, Javier Arias, durante a presentación dos finalistas dos Premios Mestre Mateo, organizados pola Academia Galega do Audiovisual.
Segundo explicou Arias, a semana pasada convocáronse as subvencións destinadas á produción e coprodución de proxectos audiovisuais galegos, que contan cun orzamento de 3,5 millóns de euros. Esta contía supón un incremento do 16,6 % respecto ao exercicio anterior. Ademais, dentro da planificación prevista para 2026, a Xunta incluirá achegas dirixidas á organización de festivais audiovisuais, á promoción do talento galego e á atracción de rodaxes a Galicia.
A gala de entrega dos Premios Mestre Mateo celebrarase o vindeiro 21 de marzo no Auditorio Fuxan os Ventos, en Lugo. Trátase dunha infraestrutura cultural na que a Xunta investiu 25 millóns de euros, concibida para acoller eventos de relevancia no ámbito cultural e audiovisual.
Durante a súa intervención, o delegado territorial destacou a evolución do sector audiovisual galego, reflectida nas 186 producións inscritas nesta edición dos premios, un dato que, segundo indicou, amosa o dinamismo e a consolidación dun sector en crecemento.
Entre os filmes con nominacións hai obras de cineastas lugueses. como son as películas Antes de nós, Sirāt ou 360 curvas.
