Os bombeiros de Vilalba rescataron onte ao condutor dunha furgoneta que quedou atrapado despois de colidir cun turismo cando circulaba pola A-8, ao paso pola parroquia vilalbesa da Torre.
Segundo a información facilitada ao 112 Galicia, a colisión produciuse preto das dez da noite pasada no punto quilométrico 583 da A-8, en sentido ao seu enlace coa A-6.
Como consecuencia do impacto, o condutor da furgoneta quedou atrapado e tivo que ser liberado polos efectivos do Servizo de Prevención, Extinción de Incendios e Salvamento de Vilalba.
Unha vez fóra do vehículo, o ferido puido ser atendido polo equipo do 061-Urxencias Sanitarias, aínda que o seu estado de saúde non revestía gravidade.
Tamén foi trasladado o único ocupante do turismo co mesmo obxectivo de someterse a unha revisión médica e descartar posibles lesións.
