As Asociacións de Nais e Pais dos colexios onde o servizo de comedores escolares viña sendo de titularidade pública asumirán a xestión do servizo até finais de ano a través dun contrato coa empresa suministradora.
Así se acordou esta tarde nunha xuntanza mantida entre representantes das Anpas e do Concello de Lugo. O concelleiro de Educación, Manuel Núñez lembrou que persoal técnico municipal e da Consellería de Educación traballan co obxectivo de asinar un convenio para prestar o servizo dende o vindeiro 1 de xaneiro de 2017, que asumirá o Concello de Lugo.
“En todo caso mantemos un proceso de negociación ata primeiros de agosto para acordar conxuntamente coas ANPAS o modelo de xestión máis axeitado ás necesidades das familias”, subliñou o concelleiro.
A polémica en torno a este servizo xurdiu hai uns meses cando o grupo de ACE-Esquerda Unida denunciou que a empresa que prestaba o servizo de comedores escolares onde este era de titularidade pública facíao sen contrato nin convenio en vigor coa entidade local.
