Lugo converterase este domingo nun dos grandes referentes do hip hop galego coa celebración da cuarta proba da Liga Galega desta disciplina, que reunirá no Pazo dos Deportes a máis de 800 deportistas procedentes de toda a comunidade autónoma.
A competición, prevista para o 7 de xuño, congregará a centos de bailaríns e bailarinas de diferentes categorías e clubs, nunha cita que volverá situar á cidade como escenario de referencia para unha modalidade que continúa gañando practicantes e seguidores en Galicia.
Entre os participantes estarán os dous clubs lucenses que concentran a práctica desta disciplina na cidade, Star Dance e Gravitty, que competirán diante do público local nunha xornada que se prevé multitudinaria.
Precisamente, o club Star Dance é o encargado da organización do evento, que foi presentado esta tarde nas instalacións do Pazo dos Deportes. A entidade lucense asumiu a coordinación dunha cita que suporá a chegada á cidade de centos de deportistas, familiares e acompañantes, xerando tamén un importante movemento de visitantes durante a fin de semana.
A cuarta proba da Liga Galega de Hip Hop forma parte do calendario autonómico desta especialidade e permitirá aos participantes seguir sumando puntos de cara á clasificación final da competición.
O Pazo dos Deportes permanecerá aberto ao público durante toda a xornada para que os afeccionados e veciños que o desexen poidan asistir ás probas. Con esta cita, Lugo reafirma a súa aposta pola acollida de eventos deportivos de gran participación, capaces de dinamizar a cidade e de promover disciplinas emerxentes que contan cunha crecente presenza entre a mocidade galega
