O concelleiro de Mobilidade e Infraestruturas de Lugo, Antonio Ameijide, deu a coñecer este martes as melloras que o actual Goberno local pretende introducir no proxecto de rehabilitación da Fábrica da Luz, co obxectivo de completar a recuperación deste edificio situado á beira do río Miño.
Segundo explicou o edil, o Concello recibiu un proxecto elaborado polo anterior executivo municipal que contempla a creación dun espazo expositivo no inmoble, pero que, ao seu xuízo, non resolve aspectos relacionados coa interpretación da antiga central hidroeléctrica e coa integración dos seus elementos históricos no percorrido visitable.
Ameijide indicou que a proposta existente non incluía a exhibición das antigas turbinas, da maquinaria histórica e doutros compoñentes vinculados ao funcionamento da central, e sinalou que a solución prevista consistía en cubrir estes elementos mediante vinilos instalados nas cristaleiras.
Durante unha visita ás instalacións, responsables municipais comprobaron tamén outras cuestións pendentes de resolver, entre elas as condicións de seguridade no acceso á planta baixa. O concelleiro fixo referencia ademais á presenza dunha caldeira sen uso e parcialmente inundada, así como á situación dun ascensor que, segundo indicou, permanece fóra de servizo debido ás inundacións.
O responsable de Mobilidade e Infraestruturas lembrou que a Fábrica da Luz foi obxecto de varias actuacións de rehabilitación nas últimas décadas e afirmou que distintos proxectos e investimentos realizados non chegaron a culminar coa posta en funcionamento do espazo conforme aos obxectivos previstos.
Neste contexto, destacou que as dúas turbinas deseñadas para un dos proxectos de xeración eléctrica continúan almacenadas nunha nave situada no Corgo, o que supón, segundo os datos facilitados polo Concello, un custo mensual próximo aos 2.000 euros desde marzo de 2022.
O Goberno local asegura que o seu propósito é converter a Fábrica da Luz nun equipamento integrado na oferta patrimonial e turística da cidade e rematar coa situación de provisionalidade que, segundo sostén, caracterizou este proxecto durante anos.
Antonio Ameijide referiuse tamén ao estado da contorna do edificio, onde a presenza de vexetación dificulta actualmente a visibilidade e o acceso a distintas zonas de interese ambiental e de lecer.
Neste sentido, informou de que o Concello solicitou autorización á Confederación Hidrográfica Miño-Sil para acometer labores de limpeza e acondicionamento da área coa maior celeridade posible.
