O Concello de Lugo formalizou este xoves o contrato para a execución dos traballos de roza das pistas municipais do rural, un servizo que permitirá iniciar a próxima semana as labores de limpeza e mantemento da rede viaria das parroquias.
O contrato conta cun orzamento de 203.280 euros e estruturouse en catro lotes co obxectivo de facilitar unha execución máis áxil dos traballos en todo o territorio rural. Os lotes correspondentes ás zonas Leste e Norte foron adxudicados á empresa Diego Besteiro, mentres que os das zonas Sur e Oeste serán executados pola empresa Moure.
As actuacións consistirán na roza mecánica das marxes dos camiños municipais mediante tractores equipados con rozadoras para eliminar a vexetación herbácea e arbustiva. Nos puntos onde a maquinaria non poida acceder polas características do terreo realizaranse tarefas de roza manual.
Segundo informou o Concello, coa formalización do contrato conclúe a tramitación administrativa do expediente e queda habilitado o inicio da prestación do servizo. O proceso de contratación iniciou a súa fase de avaliación de ofertas o pasado 8 de maio. A adxudicación foi aprobada pola Xunta de Goberno Local o 8 de xuño e, unha vez cumpridos os prazos legais para a formalización, o contrato quedou asinado este xoves.
A previsión municipal é que os traballos comecen a próxima semana e se desenvolvan de maneira progresiva nas catro áreas nas que se dividiu o municipio. O obxectivo das actuacións é mellorar a visibilidade nas vías, incrementar a seguridade viaria e facilitar o acceso ás vivendas, explotacións agrarias e fincas situadas no ámbito rural.
