A Xunta de Goberno Local do Concello de Lugo aprobou este luns un paquete de acordos que inclúe medidas para ampliar a oferta de instalacións deportivas, impulsar a reforma da Protectora de Animais de Muxa, reforzar o mantemento das vías urbanas e avanzar na organización dos servizos municipais.
Un dos principais asuntos tratados foi a adhesión ao convenio marco promovido pola Federación Galega de Municipios e Provincias (FEGAMP) e a Consellería de Educación, Ciencia, Universidades e Formación Profesional, que permitirá habilitar o uso das instalacións deportivas dos centros educativos públicos fóra do horario lectivo e durante as fins de semana.
Esta adhesión constitúe o paso previo á sinatura de acordos específicos con cada centro educativo que decida participar. Nestes convenios concretaranse os espazos, horarios e condicións de utilización, mantendo sempre a prioridade da actividade docente.
Segundo o Goberno municipal, a iniciativa pretende optimizar o aproveitamento das instalacións públicas e incrementar os espazos dispoñibles para os clubs e entidades deportivas da cidade. O Concello asumirá a organización das actividades autorizadas, así como as tarefas de limpeza e parte dos custos de mantemento derivados do uso destes espazos.
Máis de 744.000 euros para a Protectora de Muxa
Entre os acordos máis relevantes figura tamén a aprobación do convenio para executar a reforma e ampliación da Protectora de Animais de Muxa. O investimento ascende a 744.436,09 euros e será financiado a partes iguais polo Concello de Lugo, a Xunta de Galicia e a Deputación Provincial.
As obras, cuxo inicio está previsto para este verán, desenvolveranse en varias fases entre 2026 e 2027. O proxecto contempla a legalización e ampliación das instalacións actuais, ademais da mellora das zonas de aloxamento dos animais, da atención veterinaria e da adaptación do centro ás esixencias da normativa vixente.
Novo contrato para o mantemento das rúas
A Xunta de Goberno Local deu tamén luz verde aos pregos para licitar un novo contrato de mantemento e conservación das vías públicas urbanas cun orzamento de 400.000 euros.
O servizo dividirase en dous lotes: un primeiro, de 250.000 euros, destinado ao mantemento de beirarrúas, pavimentos urbanos e do Casco Histórico; e un segundo, de 150.000 euros, centrado na reparación dos pavimentos asfálticos. O contrato terá unha duración inicial dun ano e poderá prorrogarse ata un máximo de tres.
Servizos municipais e investimentos
Na mesma sesión aprobouse a adxudicación do contrato para a produción técnica e os servizos do Auditorio Municipal Fuxan os Ventos por importe de 158.981 euros, así como a concesión da explotación da cafetería da piscina municipal das Pedreiras durante un período de 15 anos.
Ademais, iniciouse a contratación do subministro de ferramentas para o Cemiterio Municipal de San Froilán, cun orzamento de 3.837 euros, e aprobouse a formalización dunha operación de crédito a longo prazo de 17,86 millóns de euros destinada a financiar os investimentos previstos no orzamento municipal de 2026.
No ámbito da conciliación familiar, tamén se acordou modificar a ratio do programa Aprende Xogando, que pasará dun monitor por cada quince participantes a un por cada dez, coa finalidade de reforzar a atención ao alumnado.
Acordos en materia de persoal
A Xunta de Goberno Local adoptou igualmente diversas decisións relacionadas coa organización interna do Concello. Entre elas figuran a cobertura temporal de varios postos de responsabilidade mediante comisións de servizo, a convocatoria da xefatura do Servizo de Urbanismo por libre designación e a aprobación das bases para cubrir, mediante mobilidade, tres prazas da Policía Local incluídas na Oferta de Emprego Público de 2026.
