O Concello de Lugo iniciou os trámites para a construción dun novo campo de fútbol de herba artificial en San Fiz, unha actuación coa que busca ampliar a rede de instalacións deportivas municipais e dar resposta á crecente demanda de espazos para a práctica do fútbol base.
A alcaldesa, Elena Candia, presentou a iniciativa acompañada polo concelleiro de Deportes, Damián Carballo, e pola concelleira María Reigosa. O primeiro paso será a licitación da redacción do proxecto técnico, que definirá as características da nova infraestrutura, prevista nunha parcela municipal da zona.
O proxecto, que ten un orzamento de 500.000 €, contempla a creación dun campo de herba artificial de última xeración, a construción dun módulo de vestiarios con todos os servizos, o peche perimetral do recinto e a instalación dun sistema de iluminación que dará servizo tanto ao novo campo como ao campo municipal de rugby contiguo. Ademais, habilitaranse novos vestiarios para esta última instalación.
Segundo explicou o Concello, a actuación responde á elevada ocupación que rexistran os actuais campos municipais de fútbol. Lugo conta con cinco instalacións deste tipo, utilizadas por 14 entidades deportivas que reúnen preto de 3.000 licenzas e 138 equipos de diferentes categorías. A intensa actividade diaria de adestramentos e competicións limita, segundo o Goberno local, a dispoñibilidade de horarios para os clubs.
O Executivo municipal sinala que o novo campo permitirá desconxestionar a actual rede de instalacións, mellorar as condicións para a práctica deportiva e reforzar o apoio ao deporte base. Tamén destaca que a actuación mellorará os servizos do campo municipal de rugby grazas á dotación de iluminación e novos vestiarios.
A iniciativa xorde, segundo o Concello, das reunións mantidas coas entidades deportivas da cidade, nas que os clubs trasladaron a necesidade de incrementar os espazos dispoñibles para adestramentos e competicións.
