A quinta edición do certame inclúe concertos na Praza Maior e no Círculo das Artes, ademais dun curso-concurso de dirección musical
O Lugo Music Festival celebra ata o sábado 22 de agosto a súa quinta edición coa participación de arredor de 150 músicos, na súa maioría lucenses. O programa combina música clásica e tradicional con jazz e outros estilos populares.
A alcaldesa de Lugo, Elena Candia, recibiu este mércores na Casa do Concello unha representación da organización e dos participantes. Ao encontro asistiu o director artístico do festival, Cristóbal Soler, así como integrantes do comité organizador e directores procedentes de diferentes puntos de España, Bruxelas, Londres e Ucraína.
A Praza Maior acolleu o martes o concerto inaugural da Banda Sinfónica. O festival continúa este mércores, ás 20.00 horas, cun recital de solistas no Círculo das Artes, coa participación de Gerald Vázquez e da cantante Iria Estévez.
O xoves 20, á mesma hora, o Ensemble Xuvenil de Ventos ofrecerá un concerto na Praza Maior coa participación de Tabea Graser. A programación regresará o venres ao Círculo das Artes cunha actuación de Graser acompañada polo Grupo de Corda e Piano.
A clausura celebrarase o sábado, ás 20.00 horas, tamén no Círculo. Incluirá un concerto do Grupo de Corda e Piano, a final do V Curso-Concurso de Dirección Musical, unha mostra de baile con Nati & Jose Swing e a intervención do saxofonista Kike López.
O programa complétase con ensaios abertos ao público entre o mércores e o venres.
