Dúas persoas resultaron feridas na mañá deste luns tras envorcar o turismo no que circulaban pola estrada provincial LU-P-2609. Unha delas tivo que ser liberada polos Bombeiros de Viveiro mediante o uso de material de excarceración.
O accidente produciuse pouco despois das 6.30 horas, á altura do quilómetro 2. Segundo informou o 112 Galicia, as primeiras chamadas alertaban da posible presenza de persoas feridas e atrapadas no interior do vehículo.
A central de emerxencias mobilizou o Servizo de Urxencias Sanitarias de Galicia-061, os Bombeiros de Viveiro e a Garda Civil de Tráfico.
Os bombeiros tiveron que empregar material de excarceración para liberar unha das persoas implicadas no sinistro. Finalmente, os equipos sanitarios desprazados ata o lugar atenderon dous feridos.
