Os Microefectos Dramatúrxicos regresarán esta semana ao Club Clavicémbalo de Lugo cunha nova sesión de microteatro. As representacións terán lugar o xoves 3, o venres 4 e o sábado 5 de setembro, con dous pases cada día: un ás 20.30 e outro ás 22.30 horas.
A programación chega tres meses despois da anterior sesión do grupo e estará composta por catro obras novas. As pezas teñen unha duración aproximada de vinte minutos e abordan diferentes historias cunha linguaxe directa e contemporánea.
Nesta edición representarase O permiso, escrita e dirixida por María Grandío, coa participación de Elvira Velasco, Anxo Manoel, Brian Rodríguez, Raquel L. Cendán e a propia autora.
Brais García escribe e dirixe As ramistas, interpretada por María Grandío, Elvira Velasco e o propio García. Pola súa banda, Raquel L. Cendán asina a escrita e dirección de Cíborg, na que actúa xunto a Brais García e Elvira Velasco.
A cuarta proposta será Burramia artificial, escrita e dirixida por Brian Rodríguez. O elenco está formado por María Grandío, Anxo Manoel e o propio Rodríguez.
As entradas poden adquirirse anticipadamente a través da plataforma Woutick. Tamén estarán dispoñibles na billeteira do Club Clavicémbalo antes de cada pase.
Os Microefectos Dramatúrxicos cumpriron o pasado maio trece anos de actividade, centrada na representación de obras breves en espazos de proximidade.
