Un home de 56 anos faleceu este luns mentres realizaba tarefas de rozado nun monte de Santa Cruz de Parga, no municipio chairego de Guitiriz. A hipótese que se manexa inicialmente é que puido sufrir unha indisposición mentres se atopaba ao volante do tractor.
Un particular localizou o traballador arredor das 13.15 horas, despois de advertir que o vehículo permanecía aceso e que o home estaba inconsciente no interior da cabina. O suceso produciuse nas inmediacións da estrada LU-170, a uns 500 metros do parque eólico de Casa.
Os servizos de emerxencia acudiron ao lugar, pero non puideron facer nada por salvar a vida do home. Polo momento, a posible indisposición constitúe a hipótese inicial sobre as causas do falecemento, á espera de que as actuacións correspondentes permitan esclarecer as circunstancias do suceso.
