O Concello de Lugo abriu a convocatoria do Banco de Instrumentos da Escola Municipal de Música para o curso 2026-2027, un servizo de préstamo que busca facilitar o acceso á formación musical, especialmente ao alumnado pertencente a familias con maiores dificultades económicas.
O programa pon á disposición dos estudantes instrumentos de distintas especialidades, entre eles bombardinos, clarinetes, fagots, gaitas prácticas en Do, saxofóns altos, trombóns, trompas, trompetas, tubas e lotes de percusión.
Poderá optar ao préstamo o alumnado de pleno dereito da Escola Municipal de Música que estea empadroado en Lugo, non supere as cinco faltas na materia correspondente e dispoña de praza na especialidade directamente relacionada co instrumento solicitado. Tamén será requisito non ter débedas pendentes co Concello.
As solicitudes deberán presentarse no Rexistro Xeral municipal ou a través dos medios previstos na normativa administrativa, mediante o formulario establecido e acompañadas da documentación requirida nas bases. Entre os documentos necesarios figuran unha copia compulsada do DNI e o certificado de empadroamento no que consten as persoas que conviven no domicilio.
A adxudicación dos instrumentos realizarase en función da situación económica da unidade familiar, mediante un baremo que concede maior puntuación ás familias con menores ingresos. No caso de empate, terá preferencia a renda per cápita máis baixa.
Cada estudante poderá solicitar un único instrumento. O préstamo terá unha duración máxima dun curso académico, de outubro a xuño, polo que será necesario presentar unha nova solicitude en cada convocatoria anual.
O prazo para participar neste proceso estará aberto do 23 de novembro ao 4 de decembro de 2026, ambos os días incluídos.






