O delegado territorial da Xunta en Lugo, Alfonso Villares, animou ás persoas maiores de 65 anos a aproveitar as vantaxes do Carné+65, un programa que ofrece descontos en produtos e servizos en establecementos de toda Galicia.
Villares visitou varios negocios da capital lucense adheridos á iniciativa, que conta con máis de 110 establecementos participantes na provincia e preto dun milleiro no conxunto da comunidade. Entre eles hai casas rurais, axencias de viaxes, balnearios, ópticas, farmacias, tendas de moda e servizos culturais e de ocio.
O Carné+65 é gratuíto e non require activación. As persoas titulares só teñen que presentalo nos establecementos asociados para acceder ás condicións e descontos ofrecidos por cada negocio.
As persoas de 65 anos ou máis empadroadas en Galicia reciben o carné directamente no seu domicilio. Quen non o teña recibido pode solicitalo por correo electrónico. A Xunta dispón tamén dunha páxina web na que se pode consultar a listaxe de negocios adheridos e a información do programa.
A iniciativa busca favorecer o envellecemento activo e facilitar o acceso das persoas maiores a actividades, produtos e servizos en condicións vantaxosas.
