A Subdelegación do Goberno en Lugo acolleu este sábado un recital de poesía e danza para reivindicar a liberdade de expresión e achegar á cidadanía, especialmente á mocidade, valores como a igualdade, a tolerancia e o pluralismo. A iniciativa, promovida pola Subdelegación en colaboración co Comisionado para a Celebración dos 50 anos de España en liberdade, reuniu as poetas galegas Olga Novo e Olalla Cociña e unha parella de bailaríns da escola lucense Gravitty.
O acto combinou a lectura de poemas seleccionados polas propias autoras cunha actuación coreográfica, nunha proposta que empregou a literatura e a expresión artística como vías para reflexionar sobre os dereitos e as liberdades democráticas.
A subdelegada do Goberno en Lugo, Olimpia López, presentou a actividade e convidou as persoas asistentes a dedicar un tempo á escoita e á reflexión colectiva. López destacou a importancia de recoñecer o traballo das xeracións anteriores na conquista dos dereitos dos que goza a sociedade actual.
A responsable da Subdelegación agradeceu a participación das dúas poetas por contribuír, a través da súa obra, a dar visibilidade ás distintas realidades sociais e aos valores asociados á democracia.
