O Grupo Municipal Socialista reclamou ao Goberno local de Lugo a reparación e posta en funcionamento da Fonte do Rei, que, segundo denuncia, permanece inutilizada desde a chegada de Elena Candia á Alcaldía.
A portavoz adxunta do PSOE, Ana González Abelleira, asegurou que a fonte leva máis de cinco meses sen funcionar e pediu ao Executivo municipal que acometa os traballos necesarios para recuperar este elemento urbano, situado nun dos principais accesos á cidade pola zona sur.
A edil considera que se trata dunha actuación de mantemento que debería resolverse sen máis demora, tanto pola singularidade da fonte como pola súa visibilidade. Neste sentido, sinalou que o seu estado afecta á imaxe da cidade para as persoas que acceden a Lugo por esta zona.
González Abelleira tamén criticou a xestión do Goberno local e cuestionou as prioridades do executivo, ao que reprochou que manteña pendentes actuacións que considera básicas mentres modifica as prioridades orzamentarias.
A representante socialista asegurou que o seu grupo está trasladando ao Goberno municipal distintas demandas relacionadas co mantemento e os servizos da cidade e insistiu en que a reparación da Fonte do Rei debe abordarse de maneira inmediata.
O PSOE pide así que se executen as intervencións necesarias para recuperar o funcionamento da instalación, que, segundo a formación, permanece sen actividade desde hai case medio ano.
