A Asociación Traxandaina, en colaboración coa Xunta, impulsará un centro de interpretación do traxe tradicional galego na rúa do Miño, no barrio da Tinería
O delegado territorial de Lugo, Javier Arias, explicou que a Administración autonómica está avanzando nos trámites para que o proxecto, único en Galicia, poida ver a luz nos vindeiros meses. Sinalou que a asociación poderá utilizar un local cedido polo Instituto Galego da Vivenda e Solo á Consellería de Cultura, Educación, FP e Universidades para que poida ser empregado como espazo expositivo. O local esta situado a escasos metros da oficina de turismo e o Centro de interpretación do Camiño de Santiago.
Arias subliñou que este proxecto cultural contribuirá a dinamizar este histórico barrio ” introducindo un recurso turístico e cultural máis, que será polo de atracción para os visitantes e para os veciños e veciñas da cidade”.
