Una persoa faleceu e outras tres resultaron feridas de gravidade nun accidente ocorrido esta maña no Alto da Gañidoira. O sinistro tivo lugar no termino municipal de Muras e nel víronse implicados dous vehículos.
O Centro Integrado de Atención ás Emerxencias (CIAE) 112 Galicia tivo constancia do suceso ás nove desta mañá mediante as chamadas de alerta de varios particulares que pedían axuda urxente para os implicados no sinistro rexistrado na LU-540, á altura da Gañidoira.
Así, ademais dos profesionais sanitarios, o persoal do 112 solicitou a colaboración dos bombeiros de Vilalba e Viveiro debido a que os feridos estaban tamén atrapados no interior dos vehículos. Finalmente, foron excarceradas catro persoas, dúas en cada vehículo, das cales unha estaba falecida e outras tres resultaron feridas. Un equipo do 061-Urxencias Sanitarias encargouse do seu traslado ao complexo hospitalario de referencia.
Igualmente, como consecuencia do accidente, rexistráronse na zona importantes retencións de tráfico sumado á baixa visibilidade por mor da néboa. Co fin de garantir a seguridade e facilitar a labor dos equipos de salvamento, actuaron no punto os axentes da Garda Civil de Tráfico e tamén o persoal de limpeza e mantemento da Axencia Galega de Infraestrruturas.