Adif propón a clausura do paso a nivel de Recimil ata a súa supresión definitiva. Mentres tanto, para darlle servizo ao tránsito de vehículos, executaría un camiño que con carácter provisional conectaría de maneira paralela co paso inferior situado a 300 metros, máis ao norte.
Así o expuxo ao Concello de Lugo e as plataformas de veciños, en dúas reunións mantidas hoxe, xunto á subdelegación do Goberno de Lugo, aos que reiterou as súas condolencias polo terrible incidente.
En paralelo, a compañía segue traballando na licitación da supresión definitiva do paso a nivel, que prevé adxudicar no mes de decembro deste ano, co fin de concluír as obras en xuño de 2025. Este proxecto contempla unha solución sen restricións futuras para o tráfico, en base á construción dun novo paso inferior, lixeiramente cara ao sur (pk 423/960), de altura libre de 5 m, así como a realización de camiños de ligazón co viario actual e outros de acceso ao novo paso, garantindo a mobilidade e permeabilidade da zona.
A actuación forma parte do plan de supresión de catorce pasos a nivel no municipio de Lugo: oito deles xa se atopan en execución e seis, entre eles o situado en Recimil, xa contan co proxecto aprobado e licitaranse antes de que finalice o ano.
O peche anticipado do paso a nivel de Recimil conlevaría a construción por parte de Adif dun camiño provisional paralelo á vía, pola súa marxe dereita, que conectaría o paso a nivel cun inferior a 300 m ao norte.
A solución requiriría a disposición de terreos, de titularidade privada, nuns 100 m (lonxitude estimada onde os terreos non son propiedade do xestor ferroviario). Estímase que a realización deste camiño provisional podería concluír nuns tres meses unha vez que teña a dispoñibilidade do chan.
O Concello de Lugo comprometeuse a xestionar cos veciños a cesión do chan, para poñelos ao dispor de Adif. A proposta exposta preséntase como alternativa a outra que estudaba a compañía: o peche anticipado do paso a nivel co desvío do tráfico rodado por itinerarios alternativos durante 20 meses; asumindo melloras puntuais nos camiños de ligazón.
