A Alcaldesa participa na presentación de ‘Galegos Universais’, que “sitúa á nosa terra no centro do mundo”

A Alcaldesa de Lugo, Lara Méndez, participou este martes na Galería Sargadelos na presentación do libro Galegos Universais. A Influencia de Galicia no Mundo, unha obra que afonda na biografía de cinco persoeiros que deixaron unha fonda pegada na historia universal e que “sitúa aos galegos e á nosa terra no centro do mundo”, subliñou a rexedora. No acto participaron a Deputada provincial de Cultura, Pilar García Porto, o editor, Francisco Rodríguez Iglesias, e o autor da biografía de Prisciliano, incluída na obra, Victorino Pérez Nieto.

Xunto a Prisciliano, a publicación aborda a historia e a súa vinculación con Galicia doutros catro persoeiros: Xelmírez, Cristóbal Colón, Simón Bolívar e Fidel Castro. “Somos un pobo espallado polo mundo, e non sempre porque quixéramos marchar, senón porque as circunstancias levaron moita xente nosa, entre eles aos meus pais, a buscar a vida fóra. Como foi tamén o caso dos fidalgos devanceiros de Simón Bolívar e do pai de Fidel Castro, un campesiño pobre lancarao que non emigrou por gusto, nin mesmo por ambición, senón por pura necesidade”, asegurou a Alcaldesa.

Asemade, Lara Méndez engadiu que “tamén en Galicia podemos ser galegas e galegos universais. E queremos selo, porque sermos galegos e galegas é precisamente a nosa maneira de sermos cidadáns e cidadás do mundo, dun mundo que hoxe, para ben e para mal, é global e policéntrico, de maneira que nin sequera nos fai falla estar en París ou en Nova Iork para estarmos no centro do mundo. E unha maneira de estarmos no centro do mundo é tamén facer libros coma este, no que se reúnen cinco grandes mitos da historia universal que naceron ou tiveron raíces na nosa terra”.

Novas relacionadas

Deixar unha resposta

A súa dirección de email non será publicada. Os campos requeridos están marcados *

Este sitio emprega Akismet para reducir o spam. Aprende como se procesan os datos dos teus comentarios.


Diario de información xeral sobre Lugo e a súa provincia
San Salvador de Muxa 124 27192, Lugo

WP Twitter Auto Publish Powered By : XYZScripts.com