A primeira hora desta maña produciuse un incendio nunha casa na aldea de A Raíña, sita na parroquia de Martín no municipio de Bóveda. Na casa residen dúas persoas de avanzada idade que, segundo aseguraron familiares moi achegados, atopábanse no interior do inmoble cando se propagou o lume.
Un alertante chamou ao 112 Galicia sobre as 09:30 horas para pedir axuda. Indicaba que ardía unha casa, que xa caera o tellado e que había dúas persoas no seu interior. De inmediato, dende o Centro de Atención ás Emerxencias do 112 Galicia, pasouse aviso a Urxencias Médicas e aos Bombeiros de Monforte. Tamén se puxeron os feitos en coñecemento da Garda Civil, do Concello e alertouse aos Bombeiros de Chantada por si fose necesaria a súa intervención.
Nestes intres, os membros do parque comarcal de Monforte continúan no punto, ao igual que o resto dos servizos de emerxencia alí desprazados. Confirmaron que a casa colapsou por completo, caeron as paredes e o tellado, e, procederán á retirada de escombros para iniciar a procura dos habitantes do inmoble. Ademais, solicitaron unha ambulancia para un dos familiares -das posibles vítimas- ao sufrir unha crise de ansiedade.