As residencias da terceira idade xestionadas pola Deputación Provincial de Trabada, Pol e Ribadeo acolleron hoxe a programación especial organizada pola institución para celebrar o Día Internacional das Persoas Maiores. Nesta xornada participou o deputado de Promoción Económica e Social, Pablo Rivera Capón que se achegou ata Pol para compartir cos usuarios da residencia diversas actividades pensadas para este día.
“Dende a Deputación nos sumamos á reivindicación das importantes achegas que os nosos maiores fan á sociedade, da necesidade de crear conciencia sobre as oportunidades e desafíos asociados ao envellecemento e de promover a súa atención, promoción e apoio”, subliñou o Deputado.
Un photocall, baile, bingo e obradoiros foron algunha das propostas das que gozaron os usuarios e usuarias das residencias de Pol, Trabada e Ribadeo, ademais dun menú especial, que compartiron co responsable provincial de Promoción Económica e Social. Recibiron tamén como sorpresa unha mensaxe gravada de Xosé Ramón Gayoso, o famoso presentador do programa máis lonxevo da TVG, Luar.
