Aspnais, Asociación de pais e titores de persoas con discapacidade intelectual, sente a profunda dor de comunicar o pasamento de María Concepción Teijeiro de Pardo Ouro, Conchita Teijeiro, pedra angular da nosa estrutura asociativa, parte esencial da nosa familia, e persoa que nos marcou a todos pola súa amizade, dedicación e entrega.
Aspnais nomeouna Presidenta de Honra, e diante do noso edificio social – antigo Hospital de San José – unha estatua en bronce, obra do artista pontevedrés José Molares, recórdaa abrazando a un neno anónimo que representa a todos os usuarios do noso colectivo.
Como Presidente de Aspnais, admirador e colaborador de Conchita durante décadas, no nome de todos os membros da nosa gran familia – usuarios, pais, coidadores, técnicos, colaboradores e amigos – expresamos á súa familia a nosa fonda condolencia, e pedimos aos lucenses que garden lembranza garimosa desta persoa excepcional que aos de Aspnais entregou os seus mellores esforzos, e parte esencial da súa vida.
José Reigosa García.
Presidente de Aspnais.
